Տպել
Տնտեսական մեկնաբան Բաբկեն Թունյանը ֆեյսբուքյան իր էջում գրում է. «Շատերը քննարկում են կուտակայինի հարցով վարչապետ Նիկոլ Փաշինյանի և Տնտեսական զարգացման ու ներդրումների նախարար Արծվիկ Մինասյանի բանավեճը կառավարության երեկվա նիստում։
Ինձ էս ամեն ինչի մեջ մի հարց է հետաքրքրում. բա կառավարության ծրագիրը գրելու ժամանակ կուտակայինի հարցը չի՞ քննարկվել, դիրքորոշումներն ու հնարավոր լուծումները չե՞ն հստակեցվել։
Ախր սա ինչ-որ X ընկերությանը մաքսատուրքի հետաձգման գծով արտոնություն տալու«սուտի»հարց չի։ Սա Հայաստանի նորագույն պատմության ամենակարևոր ու ամենալուրջ ռեֆորմներից մեկն է։
Ավելին ասեմ, իմ իմանալով՝ նախկին կառավարության տնտեսական բլոկի որոշ պատասխանատուներ պաշտոն ստանձնելու առաջարկ ստանալու ժամանակ հատուկ հետաքրքրվել են, թե կառավարությունը ի՞նչ դիրքորոշում է ունենալու՝ պարտադիր բաղադրիչը թողնելո՞ւ են ուժի մեջ, թե՞ ոչ։ Ու ըստ այդմ են որոշում կայացրել՝ միանա՞լ կառավարությանը, թե՞ ոչ։
Իմ կարճ խելքով՝ մայիսի 8-ից սկսած ասել եմ, որ նոր կառավարության ամենալուրջ քննությունը կուտակայինն է լինելու։ Բայց երեկվա բանավեճը ցույց տվեց, որ կառավարության ներսում էդ հարցով մեկը մյուսի հետ չեն էլ խոսել»։
