ԱՄՆ-ում 1,6 մլրդ դոլարի ջեքփոթի խաղարկությունն առնվազն մեկ հաղթող ունի

Mega Millions ամերիկյան վիճակախաղի կազմակերպիչները հայտարարել են, որ 1,6 մլրդ դոլար գումարի՝ պատմության մեջ ռեկորդային ջեքփոթի խաղարկությունն առնվազն մեկ հաղթող ունի:

Կազմակերպիչների հաղորդագրության մեջ նշվում Է, որ տոմսը, որում համընկել են բոլոր վեց թվերը, վաճառվել է Հարավային Կարոլինայի նահանգում: Ընդսմին տոմսերի ստուգումը մի քանի նահանգներում դեռեւս շարունակվում է, եւ եթե լինեն մի քանի հաղթողներ, գումարը հավասարապես կբաժանվի նրանց միջեւ: Mega Millions վիճակախաղի ջեքփոթն աճում էր հուլիսից, երբ Կալիֆոռնիայում գործընկերների մի խումբ համատեղ շահեց 543 մլն դոլար: Mega Millions-ի նախորդ ռեկորդը՝ 656 մլն դոլար, սահմանվել էր 2012 թվականին, երբ մրցանակը բաժանվեց երեք հաղթողների միջեւ: ԱՄՆ-ում խաղարկությունների ողջ պատմության ընթացքում ռեկորդը պատկանում է մեկ այլ վիճակախաղի՝ Powerball-ին. 2016 թվականի սկզբին հաղթողն ստացավ 1,586 մլրդ դոլար:

Նշվում է, որ մատնանշված գումարը նախատեսված է 30 տարվա ընթացքում միանվագ վճարումների համար: Եթե հաղթողը որոշի այդ փողը վերցնել միանգամից, նա կստանա ընդամենը 913 մլն դոլար: Mega Millions-ի անցած խաղարկությունում հաղթելու շանսերը կազմում էին 1 առ 303 միլիոն: Ընդ որում՝ այն բանի հավանականությունը, որ այդ փուլում ի հայտ կգա հաղթողը, մոտավորապես 75 տոկոս էր: Ընդսմին փորձագետները նշում են, որ վիճակախաղի տոմսերի գնորդների մեծամասնությունը առավել քիչ ապահովված քաղաքացիներն են: