Տպել
Նախարարի պաշտոնակատարը հերքում է լուրն այն մասին, թե պետությունը չի հոգում մարզիկների բուժման ծախսերը։
Օլիմպիական խաղերի, աշխարհի ու Եվրոպայի քառակի չեմպիոն Արթուր Ալեքսանյանն ԱՄՆ է մեկնել իր կամքով։ Այսօր հրավիրված ասուլիսի ժամանակ այս մասին ասաց Սպորտի և երիտասարդության հարցերի նախարարի ժամանակավոր պաշտոնակատար Գաբրիել Ղազարյանը։
Նշենք, որ Աշխարհի առաջնությունից հետո Ալեքսանյանը մեկնեց ԱՄՆ բուժվելու, և երբ հայտնի դարձավ, որ նա սեփական միջոցներով է բուժվում, պետության հասցեին քննադատության ալիք բարձրացավ ԶԼՄ-ներում և սոցցանցերում։
«Դա իր կամքն է եղել։ Արթուր Ալեքսանյանի կամ ֆեդերացիայի կողմից որևէ գրություն մեզ չի եկել։ Այն հարցը, որ ՀՀ-ում չենք զբաղվում նման մարզիկների բուժմամբ, ճիշտ չէ։ Մենք զբաղվում ենք բուժման հարցերով, բայց Հայաստանի տարածքում, ո՛չ արտերկրում»,- ասաց նա` նշելով, որ մինչև օրս ավելի քան 400 մարզիկ բուժում են ստացել Հայաստանում, ոմանք վիրահատվել են և շարունակում են մարզվել։։
Ղազարյանը խոսեց նաև Արթուր Ալեքսանյանի անվան մարզադպրոցի մասին` նշելով, որ սառույցը կոտրվել է, ու շատ շուտով ըմբշամարտի դպրոցը կվերանորոգվի և կկառուցվի ևս մեկ մարզադահլիճ: Բայց կոնկրետ թե երբ դա տեղի կունենա, Ղազարյանը չնշեց:
