«Այն, որ Ռուսաստանի իշխանությունները սկսել են հետապնդել ՀՀ քաղաքցիներին ու հայերին ընդհանրապես, փաստ է»

Հրանտ Մելիք-Շահնազարյանը ֆեյսբուքյան իր էջում գրում է. «Սոչիի օդանավակայանի մամուլի ծառայությունը հերքում է սոցիալական ցանցերում ու մամուլում տարածվող այն լուրերը, համաձայն որոնց օդանավակայանի հայազգի աշխատակիցներին ազատում են աշխատանքից։ Շատ կզարմանայի, եթե հաստատեին։ Ասեին. «Այո, հայ են, հանում ենք։ Բա խի՞ չհանենք։ Թող գնան ձեր վարչապետի ասած տնտեսական թռիչքաձև աճ ունեցող երկրում ապրեն»։ Իհարկե պիտի հերքեին։ Ազգամիջյան խնդիրները շատ սուր են Ռուսաստանում և նման հարցերը, բնականաբար, զգույշ են մեկնաբանվում։ Սոչիում առաջացած խնդրին քիչ հետո կվերադառնամ։ Հիմա մի ուրիշ նմանատիպ բան պատմեմ։

Ուրեմն այսօր առավոտյան հանկարծ պարզեցի, որ մեքենայիս մարտկոցը փչացել է։ Ու քանի որ հանդիպման էի շտապում, տաքսի բռնեցի, խնդրեցի, որ ինձ տանի ռադիոտան մոտ։ Վարորդը, որ շատ բարեկիրթ մի մարդ էր, խնդրեց ճանապարհը ցույց տամ։ Զարմացա։ Հարցրեցի Երևանի՞ց է, թե ոչ, պատասխանեց, որ մոտ մի ամիս առաջ է վերադարձել Հայաստան։

– Մոսկվայում էի ապրում, եղբայր։ Մինչ էս դեպքերը սկսվելն այնտեղ էլ էի վարորդ աշխատում։
-Ի՞նչ դեպքեր։
– Դե բռնոցիները։ Հայերի կյանքը ուտում են։ Հենց տեսնում են ղեկին հայ է, միանգամից կանգնացնում ու անիմաստ տուգանքներ են գրում։ Ոչ մի բանի չեն նայում՝ թուղթ ունես, թե՞ չէ։ Խախտում արե՞լ ես, թե չէ։ Հայ ես, ուրեմն պիտի տուգանվես։ Դե տենց հնարավոր չի աշխատել։ Թողեցի, եկա։ Քանի ավելի լուրջ խնդիրներ չեն սկսել առաջացնել հայերի համար։

Նման լուրեր էլի էի լսել, բայց այսօր ծանոթացա մարդու հետ, ով փաստացի դարձել է այդ քաղաքականության զոհը։ Մոտ երկու ամիս առաջ էլ եղբայրս է թալանվել Ռուսաստանի ճանապարհներին։ Ասում է՝ ոստիկաններն անգամ ձեռքի ժամացույցն ու հագի շորն էին փորձում վերցնել։ Թե բա՝ ժամացույցդ տուր, ճանապարհի այլ տեսուչներին կասեմ քեզ չնեղացնեն։

Իսկ այսօր արդեն Սոչիի օդանավակայանի դեպքը։ Ու թեև լուրը պաշտոնապես հերքվում է, բայց կապ հաստատեցի այնտեղ բնակվող ծանոթներիս հետ, ասում են, որ շատ լարված իրավիճակ է՝ հարյուրավոր հայերի համար խնդիրներ են առաջանում տարբեր տեղերում։

Նման բանը չի կարող պատահականություն լինել։ Այն, որ Ռուսաստանի իշխանությունները սկսել են հետապնդել ՀՀ քաղաքցիներին ու հայերին ընդհանրապես, փաստ է։ Խնդիրներ են առաջացնում նաև Հայաստանի Հանրապետության համար։ Գազի գին, զինամթերքի մատակարարում, այլ ռեսուրսների խնդիր… Մտածում եմ՝ առաջիկա օրերին այս մասին ավելի մանրամասն ուսումնասիրություն կատարել և նյութ հրապարակել։

Իսկ հիմա դեռ կարող եմ միայն ասել, որ խնդիրը քաղաքական է։ Ավելի ճիշտ՝ այս ամենը հետևանքն է այն քաղաքականության, որը վարում է Նիկոլ Փաշինյանը թե՛ Հայաստանի ներսում և թե՛ գործընկերների հետ հարաբերություններում։ Եվ սա շատ վտանգավոր է։ Որովհետև նա արդեն փաստացի խնդիրներ է ստեղծել Ռուսաստանի միլիոնավոր մեր հայրենակիցների համար։ Ու եթե այդ պրոցեսները հանկարծ շարունակվեն կամ էլ ավելի խորանան՝ ապա հետևանքները կարող են պարզապես աղետալի լինել»։