Տպել
Քաղաքական իրադարձությունները կարող են լուրջ վնաս հասցնել հոգեկան առողջությանը: Այս մասին BMJ Case Reports ամսագրում գրում է բժիշկը, որը զբաղվել է 2016-ի բրեքզիթից հետո առաջացած սուր փսիխոզով պացիենտի բուժմամբ:
Նրա խոսքով՝ մարդիկ, որոնք արդեն իսկ հոգեբանորեն խոցելի են, ռիսկի են ենթարկվում նման հանգամանքներում, գրում է MedicalXpress-ը:
Բժիշկը նկարագրում է միջին տարիքի տղամարդու դեպքը, որին 2016-ին ԵՄ-ից Մեծ Բրիտանիայի դուրսբերման մասին հանրաքվեի արդյունքների հրապարակումից 3 շաբաթ անց հիվանդանոց էին տեղափոխել սուր փսիխոզով: Տղամարդը շփոթված է եղել, անկանոն մտքեր է արտահայտել, ձայներ լսել և զառանցել: Նրա մոտ խելագարություն է սկսել: Տղամարդն ասել է, որ իրեն լրտեսում են և փորձում են սպանել:
Նրա կինն ասել է, որ հանրաքվեի անցկացման պահից իր ամուսնու համար դժվար է եղել հասկանալ քաղաքական իրադարձությունների էությունը, բացի այդ, ամուսնուն անհանգստացրել են ռասայական պատճառներով միջադեպերը, քնի հետ կապված խնդիրներ են առաջացել: Չնայած նրան, որ բժիշկները անհանգստության և անքնության դեմ դեղեր են նշանակել, տղամարդու հոգեկան առողջությունը շարունակել է վատանալ այն աստիճան, որ հիվանդանոցային շտապ բուժում է պահանջվել:
Տղամարդուն տեղափոխել են հոգեբուժական բաժանմունք, որտեղ նրան բուժել են տրանկվիլիզատորով և օլանզապինով:
Նա լիովին առողջացել է և դուրս է գրվել հիվանդանոցից 2 շաբաթ անց, որից հետո նման վիճակ տղամարդու մոտ չի կրկնվել:
Հաղորդվում է նաև, որ նրա ընտանիքում հոգեկան հիվանդություններ ունեցողներ չեն եղել: Հանրաքվեի նախաշեմին նա ճնշվածություն է զգացել աշխատանքի վայրում և տանը, ինչը, հնարավոր է, ազդել է հոգեկան առողջության վատթարացման վրա:
Այդուհանդերձ, բժիշկները նշում են, որ քաղաքական իրադարձությունները կարող են հոգեբանական սթրեսի աղբյուր դառնալ:
