Տպել
Ստամոքսի հատվածում այրոցի և կայուն թթվային ռեֆլեքսի զգացողությունը կարող են ստամոքսի քաղցկեղի ախտանիշներ լինել՝ պնդում են Տեխասի համալսարանի MD Anderson օնկոլոգիական կենտրոնի գիտնականները:
Express ամսագրի հաղորդմամբ՝ ստամոքսի քաղցկեղը քաղցկեղի ամենատարածված տեսակներից և ամբողջ աշխարհում քաղցկեղից մահացության հիմնական պատճառներից մեկն է. այդ հիվանդության դեպքում ապրելիության ցուցանիշները կազմում են ընդամենը 14 տոկոս:
Մասնագետների խոսքով՝ ստամոքսի քաղցկեղի նշաններ կարող են լինել այրոց հիշեցնող նշանները, ինչպես նաև թթվային ռեֆլեքսն ու ստամոքսում այրոցի զգացողությունը, որը երկար ժամանակ չի անցնում: Գիտնականները նշում են, որ այդ ախտանիշները կարող են կապված լինել նաև այլ հիվանդությունների հետ, օրինակ՝ աղեստամոքսային տրակտի խնդիրների հետ: Սակայն ամեն դեպքում անհրաժեշտ է խորհրդակցել բժշկի հետ:
Պետք է ուշադրության դարձնել նաև նման ախանիշների՝ արյուն կղանքի մեջ, փսխում, ախորժակի կորուստ կամ շատ արագ հագեցվածություն, անբացատրելի քաշի կորուստ, որովայնի փքում, փորլուծություն կամ փորկապություն: Ստամոքսի քաղցկեղի դասական ախտանիշ կարող է լինել ստամոքսի կենտրոնում սուր ցավը:
Գիտնականները հիշեցնում են, որ ստամոքսի քաղցկեղը կարող է երկար ժամանակ չհիշեցնել իր մասին, այդ պատճառով այն սովորաբար ուշ է ախտորոշվում: Եվ հենց այդ պատճառով խորհուրդ է տրվում բժշկի դիմել նույնիսկ ամենափոքր ախտանիշի դեպքում:
