Տպել
Մամուլում այսօր տեղեկություն հրապարակվեց, որ Երեւանի քաղաքապետարանը «Կանաչապատում և շրջակա միջավայրի պահպանություն» ՀՈԱԿ-ի տնօրենի համար հրատապ մրցույթ է հայտարարել։ Ըստ տեղեկությունների՝ ներկայիս տնօրենի ժ/պ Արմեն Բեգոյանը, տարաձայնություններ է ունեցել քաղաքապետի տիկնոջ հետ, որից հետո էլ քաղաքապետի կինը տնօրենին տեղեկացրել է, որ պետք է դիմում գրի և հեռանա:
Մեր տեղեկություններով՝ այդ ՀՈԱԿ-ի տնօրենի պաշտոնի համար քաղաքապետը մտմտում է 3 թեկնածուի շուրջ։ Մեկը՝ կնոջ՝ Իվայի ընկերուհին է՝ Քրիստինա Վարդանյանը, որը եղել է նաեւ «Բարգավաճ Հայաստան» կուսակցության ավանագու ցուցակի մեջ։ Հաջորդը՝ վերջինիս հետ բարեկամական կապ ունեցող, հանրությանն անհայտ անձ է, իսկ երրորդ թեկնածուն՝ «Թափառող Կենդանիների Վնասազերծման Կենտրոն»-ի տնօրեն Հրաչյա Աղաբեկյանն է։
Մեզ հետ զրույցում Քրիստինա Վարդանյանն ասաց, որ նման առաջարկ չի ստացել՝ շեշտելով, որ նախկինում իրեն առաջարկվել է բնապահպանության վարչության պետի պաշտոնը։
Ինչ վերաբերում է Իվայի ընկերուհի լինելու հանգամանքին, նշեց, որ իրենք միասին աշխատում են նույն ամբիոնում, ունեն լավ հարաբերություններ։
