Տպել
Առնվազն տգեղ է ու ոչ կոլեգիալ իրեն նախարար համարող մարդու համար եկած-չեկած ամեն բան բանակի «գրպանը» գցելը։ Այս մասին ֆեյսբուքյան իր էջում գրել է հասարակական-քաղաքական գործիչ Արման Սաղաթելյանը՝ անդրադառնալով ավելի վաղ ԱԳ նորանշանակ նախարարի հայտարարությանն առ այն, որ ռազմադաշտում ձախողում ունեցել ենք, դիվանագիտության մեջ՝ ոչ:
«Ես իրեն չեմ ճանաչում անձամբ, բայց ճանաչողներին խնդրում եմ դավաճանից պաշտոն վերցրած ու դրանից զարմացած էս ապուշին բացատրեք, որ եղած լայնամասշտաբ պատերազմի սկսվելը դիվանագիտության ոչ թե ձախողում է, այլ ամբողջական տապալում, ու միայն ես ժամերով կարող եմ պատմել, թե երբ, որտեղ ու ինչպես։
Ու հերիք եղավ վիրավորեք մտածող մարդկանց ինտելեկտը, արդեն սպառել եք ձեր նկատմամբ քաղաքակիրթ վարվեցողության ողջ պաշարը»,- գրել է Սաղաթելյանը:
Նշենք, որ ավելի վաղ ՀՀ արտաքին գործերի նախարար Արա Այվազյանը, այսօր Կառավարության նիստից հետո պատասխանելով Tert.am-ի հարցին, թե որպես նորանշանակ նախարար ինչ է կարծում, կարո՞ղ էինք ավելին ստանալ պատերազմի դադարեցման փաստաթղթից և համարում է արդյոք այն ձախողված փաստաթուղթ, ասել է, որ Նիկոլ Փաշինյանը հայտարարել է, որ ստանձնում է ամբողջական պատասխանատվությունը մինչև պատերազմը և պատերազմից հետո:
«Դա Ձեր որակումն է, ես չեմ մեկնաբանում, ես նոր եմ ստանձնել իմ պարտականությունը: Ռազմադաշտում ունեցել ենք ձախողում, դա պետք է ճիշտ գնահատենք, որովհետև անհամաչափ ուժերի դեմ էին հերոսաբար մեր զինվորները դիմադրում, հիմա ամբողջ մեր խնդիրն է անել հնարավորը, որպեսզի կայունանա իրավիճակը»,– ասել է նա:
Հարցին, թե դիվանագիտության մեջ ունեցե՞լ ենք ձախողում, նա պատասխանել է. «Ոչ, դիվանագիտության մեջ մենք ձախողում չենք ունեցել»:
