Դատավոր Արթուր Մկրտչյանի նկատմամբ կարգապահական վարույթ հարուցելու համար դիմում է պատրաստվել

Դիանա Գրիգորյանը ֆեյսբուքյան իր էջում գրում է․ «Հարգելի ընկերներ, Երևան քաղաքի ընդհանուր իրավասության դատարանի դատավոր Ա.Մկրտչյանի նկատմամբ կարգապահական վարույթ հարուցելու համար պատրաստել եմ դիմում՝ հասցեագրված Արդարադատության նախարարին և Ընդհանուր ժողովի Էթիկայի և կարգապահական հարցերով հանձնաժողովին:

Դիմումի ներկայացման դրդապատճառը հանդիսացել է դատավոր Արթուր Մկրտչյանի կողմից ապօրինի և անբարո դատական ակտի կայացումը, որով մերժել է Արցախյան 3-պատերազմի ընթացքում զոհված հերոսի կնոջ դիմումը՝ երեխայի հայրության ճանաչման պահանջի մասին: Կարգապահական վարույթ հարուցելու նախաձեռնության շարժառիթը հետևյալն է՝ իմ կարծիքով մեր երկրում նման անբարոյական ու արատավոր երևույթներ են կատարվում, քանի որ ոտնահարված են բոլոր սկզբունքներն ու արժեհամակարգերը և մենք՝ որպես փաստաբաններ, որպես իրավաբաններ պետք է ձևավորենք կամ վերականգնենք այն բարոյական սկզբունքներն ու արժեհամակարգերը, որոնք ընկած են պետության կառուցման և ազգի պահպանման հիմքում:

Այս նախաձեռնությունը հենց այդ գործընթացին է ուղղված: Նաև կարևորում եմ դիմումը Ընդհանուր ժողովի կարգապահական և էթիկայի հանձնաժողովին հասցեագրելը, որպեսզի դատավորները ևս իրենց համայնքում գնահատական տան դատավոր Արթուր Մկրտչյանի կողմից կայացված անբարոյական դատական ակտի: Համոզմունք ունեմ, որ նման եղանակով ևս կարելի է ձևավորել արժեհամակարգեր ու սկզբունքներ ու ձևավորել իրական ազգ, պետություն:

Տեղադրում եմ կարգապահական վարույթի հարուցման դիմումը, այն բաց է քննարկման, ավելացումների համար: Դիմումի ստորագրման վերջնաժամկետն է կիրակի, երկուշաբթի պետք է մուտքագրենք Արդարադատության նախարարություն և Ընդհանուր ժողովի կարգապահական և էթիկայի հանձնաժողով:

Հ․Գ․ Ես դիմողի ներկայացուցիչ չեմ և այս գործընթացը չի իրականացվում դիմողի անունից կամ որպես դիմողի ներկայացուցիչ, այս նախաձեռնությունը փաստաբանների կողմից իրականացվող գործընթաց է՝ որպես անբարոյական դատական երևույթների դեմ պայքար»։