Տպել
Իտալական Սիցիլիա կղզում գտնվող Մարդաբանության, պալեոպաթոլոգիայի և բիոարխեոլոգիայի հետազոտական կենտրոնի (FABAP) գիտնականները պարզել են, թե որքան էր քանդակագործ և նկարիչ Միքելանջելո Բուոնարոտիի հասակը, հայտնում է Daily Mail- ը:
Հետազոտությունն իրականացրել են պալեոպաթոլոգ Ֆրանչեսկո Մարիա Գալասին և դատական մարդաբան Ելենա Վարոտոն: Նրանք հետազոտել են նույն չափի երեք կաշվե կոշիկներ, որոնք մնացել են Ֆլորենցիայում Միքելանջելոյի տանը նրա մահից հետո:
Օգտագործելով կոշիկների երկարության (22-23 սանտիմետր) և լայնության վրա հիմնված հատուկ բանաձևը՝ Գալասսին և Վարոտոն եզրակացրել են, որ Միքելանջելոյի հասակը մոտ 160 սանտիմետր է եղել:
Թեպետ դա ժամանակակից եվրոպացու համար այնքան էլ բարձր հասակ չէ, սակայն 15-րդ դարի վերջին և 16-րդ դարի սկզբին տղամարդկանց համար նման հասակը համարվում էր միջին: Ավելին, հետազոտողները կարծում են, որ այդ կոշիկները կարող էր կրել ոչ թե ինքը՝ Միքելանջելոն, այլ նրա ընտանիքի անդամներից մեկը կամ նույնիսկ հետնորդները:
