Տպել
Մոուրինիոյի «Մանչեսթեր Յունայթեդը» մրցաշրջանը սկսեց ավելի վատ, քան Վան Գալի և Մոյեսի թիմերը: «Կարմիր ստանաներն» աջ ու ձախ միավորներ էին բաժանում, իսկ Մոուրինիոն համառորեն հնարավորություն չէր տալիս Հենրիխ Մխիթարյանին: Մխիթարյանը սկսեց խաղալ, մանչեսթերյան ակումբը սկսեց միավորներ վաստակել:
Ռուսական Sports.ru-ն պատմել է այն մասին, թե ինչպես «Մանչեսթերի» խաղը դարձավ ավելի լավը Մխիթարյանի շնորհիվ:
Ինչպե՞ս էր «Մանչեսթերը» տանջվում առանց Մխիթարյանի
Մանչեսթերյան ակումբը պարտվում էր այնպիսի մրցակիցների, որ չէին կարող երազել անգամ ակումբի մրցակիցները: Անգլիական մամուլն ամեն օր գրում էր, որ Մոուրինիոն արդեն իսկ ձախողվել է մանչեսթերյան ակումբում: Ակումբի հույսերից մեկը՝ Պոլ Պոգբան, մտածում էր Adidas-ի գովազդի մասին և խաղում էր ոչ այնպես, ինչպես սպասում էին նրանից: Երկպագուների համար միակ լուսավոր կետը Զլատան Իբրահիմովիչն էր:
Երկրպագուները զարմանում էին, թե ինչպես կարող է ակումբը պարտվել՝ մեկ խաղում հարվածելով 30 անգամ և պահեստայիններում ունենալով այնպիսի ֆուտբոլիստի, ով ճանաչվել էր Բունդեսլիգայի լավագույն ասիստենտ:
Ի՞նչ էր խոսում Մոուրինիոն Մխիթարյանի մասին
«Յուրահատուկը» հասկացնում էր, որ հայ ֆուտբոլիստը պետք է շատ աշխատի, որպեսզի դառնա «կարմիր սատանաների» հիմնական կազմի ֆուտբոլիստ: Մխիթարյանի՝ խաղադաշտում անցկացրած 30 րոպեները Մոուրինիոյին և մամուլին ստիպել էին մտածել, որ Պրեմիեր լիգան պարզապես Մխիթարյանի առաջնությունը չէ, և Հենրիխը շտապել է որոշում կայացնելիս:
Մոուրինիոն նշում էր, որ Հենրիխը չունի կարևոր խաղերում խաղալու փորձ՝ մոռանալով, որ «Բորուսիայում» Մխիթարյանը խաղում էր Չեմպիոնների լիգայում:
Սակայն Մխիթարյանի տեսակը հանձնվող տեսակ չէ: Մարզումների ընթացքում հայ ֆուտբոլիստն ապացուցում էր, որ չի պատրաստվում այսքան շուտ հեռանալ ակումբից:
Ինչպե՞ս է Մխիթարյանն իր հետևից տանում «Յունայթեդը»
Երկար ժամանակ խաղաժամանակ ստանալու համար պայքարող Մխիթարյանը վերջապես ստացավ իր հնարավորությունը և հրաշալի օգտվեց դրանից: Մխիթարյանը մասնակցեց 3 գրեթե ամբողջական հանդիպման և երեքում էլ դարձավ խաղի լավագույն ֆուտբոլիստ:
Մխիթարյանը հայտավորվում էր աջ եզրում, բայց խաղում էր ամենուր: Առաջին խաղերում հրաշալի էր Պոգբա, Ռունի, Մխիթարյան փոխանցումների շարքը:
Հաջորդ խաղերում Մխիթարյանն ավելի ու ավելի էր ապացուցում, որ արժանի է խաղալու մեկնարկային կազմում: Լիգայի գավաթի առաջին խաղում Մխիթարյանը գրանցեց տպավորիչ վիճակագրություն. նրա փոխանցումների ճշգրիտությունը կազմեց 94 տոկոս:
Մխիթարյանն այս խաղում ունեցավ 7 հնարավորություն: Սա ավելի շատ էր, քան մանչեսթերյան ակումբի ցանկացած ֆուտբոլիստի մոտ:
Մխիթարյանի առաջին խաղերից հետո երկրպագուները պատաստ էին անգամ դատի տալ Մոուրինիոյին, եթե նա դաշտ դուրս չբերեր Մխիթարյանին:
«Զարյայի» դեմ խաղը լավագույններից էր Մխիթարյանի կարիերայում: Այստեղ հայ ֆուտբոլիստն աչքի ընկավ տպավորիչ անցումներով և կարողացավ դառնալ հաղթական գոլի հեղինակ:
Խաղից հետո Մխիթարյանն ասաց, որ հաղթական գոլը նվիրում է երկրպագուներին: Մխիթարյանը մի քանի անգամ ակնարկեց, որ իր չխաղալու մեջ մեղավորությունը Մոուրինիոյինը չէր: Մխիթարյանը հստակ հասկացրեց, որ իր կարգախոսն անընդհատ աշխատելն ու ոչ մի դեպքում «երբեք» չասելն է:
Հանդիպումից հանդիպում Մխիթարյանն այնպես կատարելագործեց իր խաղը, որ երկրպագուներն անընդհատ սկսեցին բացականչել նրա համար գրված կոչը՝ Մխիթարյան, մեր հայ կիսապաշտպան:
«Մենք գիտեինք, թե ում էինք գնում այս ամառ: Մխիթարյանին պարզապես ժամանակ էր պետք ադապտացիայի համար, իսկ տաղանդ նա միշտ ուներ: Հիմա նա հրաշալի մարզավիճակում է և օգուտ է բերում թիմին»,- Մխիթարյանի փայլուն խաղերից հետո ասաց Մոուրինիոն:
Մխիթարյանը կարողացավ մեկնարկային կազմում իր տեղը խլել Ժոզեից, ով ունի տաղանդավոր ֆուտբոլիստներին խամրեցնելու և կարիերայի վրա ազդելու մեծ տաղանդ: Մխիթարյանը ստիպեց անընդհատ բողոքող անգլիական մամուլին՝ անվանել նրան այնպես, ինպես պետք է՝ թոփ ֆուտբոլիստ: Մի՞թե այս տղան չէ, որ պետք է «Մանչեսթեր Յունայթեդին» տանի դեպի չեմպիոնություն: Հաղթանակ, որին նա այդքան հավատում է:
Սիրարփի Աղաբաբյան
