Տպել
Վաղուց արդեն ոչ մեկի համար նորություն չէ, որ թուրքերն ու ադրբեջանցիները հայկական մշակույթի շատ տարրեր և հատկապես հայկական էթնիկ երգերը վերագրում են իրենց ու պարբերաբար հանդես են գալիս ճղճիմ մեկնաբանություններով: Այս անգամ թիրախը երգչուհի Գաբի Գալոյանի մեկնաբանմամբ «Սարի աղջիկ» երգն է դարձել: Երգչուհու յութուբյան պաշտոնական ալիքում ադրբեջանցիները «հարձակում» են գործել՝ հանդես գալով հայտարարություններով, թե այս երգը պատկանում է իրենց ազգային երգադարանին:
Թեմայի շրջանակում Life.panorama.am-ը զրուցել է Գաբիի հետ: Մեզ հետ զրույցում երգչուհին նշեց, որ որևէ կերպ չի անդրադառնում ադրբեջանցիների մեկնաբանություններին, բայց նաև հայտնեց՝ զարմացած է.
«Թեև իմ կատարմամբ «Սարի աղջիկ» երգի տեսահոլովակը միայն անցյալ տարի ներկայացրեցի, սակայն իմ կատարմամբ այդ երգը համացանցում էր դեռևս 2013-ից, ու ինձ համար մի փոքր տարօրինակ է, որ տեսահոլովակից հետո նոր սկսվեց քննարկումների այդ հիստերիան: Ինչևէ, պետք է ասեմ, որ ես ու իմ պրոդյուսերությամբ զբաղվող ընկերությունը` «Գլոբալ արտ»-ը, ոչինչ չենք պատրաստվում անել, նորմալ ենք համարում, սա նրանց ձեռագիրն է, մենք չենք հավասարվի նրանց՝ մնալով մեր բարձրունքին: Թող անընդհատ իրենք իրենց համար գոչեն ու մեր մշակույթի տարբեր տարրեր իրենցը համարեն, միևնույն է, մենք հո գիտենք, թե ինչն է մեզ պատկանում, մենք ոչ մեկին ոչինչ չունենք ապացուցելու, անգամ իրենց մեկնաբանությունները չենք ջնջել իմ էջից: Այն, որ միայն հիմա ադրբեջանցիները որոշեցին այս երգի վերաբերյալ խոսել, կարծում եմ պատճառն է այն բանի, որ 2016-ի ապրիլին մենք ունեցանք ցավոտ օրեր, խոսքը՝ ապրիլյան պատերազմի մասին է»,- նշեց երգչուհին:
Գաբին հայտնեց, որ առջևում պատրաստվում է շարունակել հայկական էթնիկ երգեր ներկայացնել.
«Այս պահին երկու երգերի վրա եմ աշխատում, որոնցից մեկը գրված է հատուկ ինձ համար, իսկ մյուսը կրկին հայտնի հայկական երգ է, որը իմ մեկնաբանմամբ կներկայացնեմ հանդիսատեսին: Այս պահին զբաղված եմ նաև համերգային ծրագրով, փորձում ենք երգացանկը շատացնել, որոնք հիմնականում ժողովրդական էթնո փոփ ոճում են լինելու»,- հավելեց երգչուհին:
