Տպել
Փետրվարի 14-ին՝ Սուրբ Վալենտինի օրը դերասան, երգիչ Հայկ Պետրոսյանը հանդիսատեսին կհամոզի, որ պետք է նախապատվությունը տալ Սուրբ Սարգսի տոնին, քանի որ արևմտյան տոներից շատ ավելի մեծ առավելություններ ունեն հայկականները.
«Փետրվարի 14-ին Հ. Թումանյանի անվան Տիկնիկային թատրոնում կկայանա համերգ-ներկայացում, որի խորագիրն իր մեջ հարց ու պատասխան է կրում՝ «Սուրբ Վալենտի՞ն, ոչ՝ Սուրբ Սարգիս»: Սա իր մեջ ունի և կատակային, և լուրջ ենթատեքստ: Երեկոյի սկզբում անպայման հանդիսատեսին կատակային ժանրում պատմելու եմ այս երկու սրբերի պատմությունների մասին, այս պահին խորապես ուսումնասիրում եմ նրանց պատմությունն ու շատ հետաքրքիր փաստեր եմ բացահայտում: Համերգի ընթացքում կփորձենք մատնանշել, որ առավելությունն առաջին հերթին պետք է տրվի հայկական տոներին: Իհարկե, ես Սուրբ Վալենտինի տոնի դեմ ոչինչ չունեմ, այն շատ գեղեցիկ տոն է և անգամ նրա կերպարի մեջ սիրո թեման շատ ավելի մեծ է, քան Սուրբ Սարգսի կերպարում: Ամեն դեպքում, վերջին տարիներին ոչ միայն մեր երկրում, այլև ողջ աշխարհի երկրները գնալով կորցնում են իրենց էթնիկ դեմքը: Մենք էլ կարծես թե նախապատվությունը ավելի շատ տալիս ենք արևմտյան արժեքներին, բայց աշխարհի գլոբալիզացման հետ մեկտեղ, կարծում եմ, միաժամանակ կարելի է պահպանել նաև ազգայինը: Բնականաբար, պատմական կոնֆլիկտի չենք վերածելու մեր համերգը, բայց Սուրբ Վալենտինը հայկական սուրբ չէ, իսկ Սուրբ Սարգիսը մերն է ու պետք է նրա տոնը էլ ավելի արժևորենք ու առհասարակ՝ Եկեղեցու դերը մեր կյանքում մեծացնենք: Համերգի ընթացքում մի քանի հարցադրումներ կլինեն, որոնցով կփորձեմ իմ սերնդակիցներին մտորելու առիթ տալ: Սուրբ Վալենտինի օրը մենք ինադու Սուրբ Սարգիսն ենք նշելու, արդյունքում մեր սիրո տոնը երկու անգամ կնշենք»,- Life.panorama.am-ի հետ զրույցում նշեց Հայկ Պետրոսյանը:
Մեր զրուցակցի խոսքով՝ համերգը համեմված կլինի հումորային սկետչերով՝ կապված այս երկու տոների, և առհասարակ՝ տղա-աղջիկ հարաբերությունների հետ, այդ օրվա մթնոլորտը ռոմանտիկ կլինի:
Ի դեպ՝ Հայկ Պետրոսյանի համերգ-ներկայացմանը կմասնակցեն նաև ժողովրդական երգիչ Սևակ Ամրոյանն ու երգչուհի Սոնա Ռուբենյանը.
«Սևակն ու Սոնան բախտի բերմամբ նաև իմ ընկերներն են, նրանք այդ օրը որպես հատուկ ու առանձնահատուկ հյուրեր կլինեն իմ կողքին: Բացի երաժշտական համարներ ներկայացնելուց, նրանց հետ ծրագրում ենք նաև կատակ-զուգերգեր. Այս պահին աշխատում եմ իմ ու Սոնայի կատակ-երգի վրա: Այնպես որ, ուրախ երեկո է սպասվում»,- պատմեց Հայկը:
Այս ընթացքում Հայկ Պետրոսյանը զբաղված է նաև մարտին Բելառուսում կայանալիք փառատոնին.
«Ի ուրախություն ինձ՝ «Եթե ես լինեի պապա» ներկայացումով մարտին պետք է մասնակցեմ Բելառուսում կայանալիք փառատոնին, որի տոմսերն արդեն սպառված են: Հայաստանում այս ներկայացմամբ մասնակցեցի «Արմմոնո» թատերական փառատոնին, որտեղ էլ ինձ նկատել են ու հրավիրել: Ներկայացումը լինելու է ռուսերենով, շատ լրջորեն եմ պատրաստվում, քանի որ սա հնարավորություն կարող է ինձ տալ՝ մտնելու ռուսական շուկա»,- հավելեց դերասանը:
Հետաքրքրվելով նաև Հայկի երաժշտական գործունեությունից տեղեկացանք, որ այժմյան զբաղվածությունը նրան չի խանգարում աշխատել նաև նոր երգերի վրա.
«Նոր երգեր շատ կան, նաև այնպիսիք կան, որոնք երգել եմ համերգներին, բայց ձայնագրված չեն: Սրանցով ևս փորձում եմ զբաղվել, առջևում մեկ-երկու տեսահոլովակ էլ անպայման կներկայացնեմ: Միաժամանակ պետք է նշեմ նաև, որ ինձ համար տեսահոլովակ ունենալն ինքնանպատակ չէ, ավելին՝ ես դրանք չեմ էլ սիրում, շատ ծանր եմ տանում, երբ ես եմ նկարահանվում: Ինձ համար տեսահոլովակը շատ արհեստական մի բան է, դրա համար փորձում եմ ալտերնատիվ տարբերակներ գտնել: Միաժամանակ՝ հասկանում եմ նաև, որ մեր ժամանակների համար տեսահոլովակը պարտադրանք է»,- ընդգծեց երգիչ-դերասանը:
