Տպել
Հինգշաբթի հրապարակված թեստերի արդյունքները ցույց են տվել, որ ամերիկացի ինը տարեկանների համար ընթերցանության եւ մաթեմատիկայի մասով կատարողականի մակարդակները երկու տասնամյակ առաջ գրանցված ցուցանիշների են հասել, ինչը վկայում է ԱՄՆ կրթական համակարգին COVID-19 համավարակի հասցրած վնասի մասին, հաղորդում է Reuters-ը:
Կրթության աջակցության ազգային կենտրոնը (NCEA) COVID-19-ը 2020-ին համաշխարհային համավարակ հայտարարելուց անմիջապես առաջ արված գնահատականները համեմատել է 2022-ի սկզբին կատարված գնահատականների հետ՝ պարզելու համար, թե ինչպես են համավարակի հետ կապված ուսումնական գործընթացի խանգարումներն ազդում երեխաների առաջադիմության վրա:
Մաթեմատիկայից աֆրոամերիկացի աշակերտների գնահատականներն ընկել են 13 միավորով՝ իսպանախոս աշակերտների շրջանում 8 միավորի եւ սպիտակամորթ աշակերտների շրջանում 5 միավորի համեմատ, ինչն ավելի լայն միտման մաս է, երբ փոքրամասնություններն անհամաչափորեն են տուժում համավարակի հետեւանքներից: Ընթերցանության միավորները 2020-2022 թթ. վեց միավորով հավասարապես ընկել են բոլոր ռասայական խմբերում:
NCEA Reading Assessment-ի շրջանակներում աշակերտները կարճ տեքստեր են կարդում եւ պատասխանում են մի քանի տարբերակ ունեցող հարցերին կամ ավելի երկար պատասխաններ են գրում: Մաթեմատիկայից աշակերտները հիմնականում պատասխանում էին հիմնական մաթեմատիկական փաստերին վերաբերող մի քանի պատասխան ունեցող հարցերին։
Հետազոտության ընթացքում նաեւ դպրոցականների հարցում է անցկացվել այն մասին, թե ինչպես է համավարակն ազդել նրանց ուսումնական միջավայրի վրա: Աշակերտների 70 տոկոսն ասել է, որ հիշում է, որ 2020-2021 ուսումնական տարվա ինչ-որ պահի հեռավար է սովորել։
Հեռավար սովորող աշակերտների շրջանում ընթերցանության եւ մաթեմատիկայի 75-րդ տոկոսից բարձր կամ ավելի բարձր արդյունքներ ունեցող աշակերտների 83 տոկոսը մշտական հասանելիություն ուներ համակարգչին կամ պլանշետին՝ աշակերտների 61 տոկոսի համեմատ, որոնք 25 պրոցենտիլ կամ ավելի ցածր առաջադիմություն ունեին:
