Տպել
Մեծ Բրիտանիայում անգլիական Դերբի քաղաքի 14-ամյա բնակչուհի Ջորջիա Գրինն օգտագործել է իր սիրելի դեզոդորանտը և մահացել։ Այս մասին հայտնում է The Mirror-ը։
Աղջկա մոր՝ Քլերի խոսքով՝ դեզոդորանտի հոտը հանգստացնում էր զգացմունքային դեռահաս աղջկան։ Ջորջիան նաև սիրում էր փաթաթվել վերմակով, ուստի մի օր էլ իր վրա դեզոդորանտ է ցողել ու ծածկել գլուխը։
Ավելի ուշ Քլերը մտել է աշակերտուհու սենյակ՝ նրան թմբուկի դասի տանելու։ Մայրը փորձել է արթնացնել աղջնակին, սակայն նա չի արձագանքել։ Անհանգստացած կինը շտապ օգնություն է կանչել։ Բժիշկները պարզել են, որ աղջիկը մահացել է սրտի կանգից։
Քլերը պնդում է, որ իր դուստրը բացարձակապես առողջ է եղել և երբեք լուրջ հիվանդություն չի ունեցել։ «Ջորջիայի անսպասելի մահն իսկական ցնցում էր մեզ համար»,- խոստովանել է մայրը։
Այժմ մահացածի ծնողները ձգտում են հնարավորինս շատ մարդկանց տեղեկացնել աերոզոլների վտանգի մասին։ «Մեր աղջիկը մահացել է, քանի որ շատ էր դեզոդորանտ ցողել: Խնդրում եմ, օգնեք մեզ տարածել այն մասին, որ աերոզոլային տարաներում առկա թունավոր քիմիական նյութերն ու գազերը կարող են մահվան պատճառ դառնալ, և դա միայն երեխաներին չի վերաբերում»,- խնդրում են նրանք։
