Տպել
ABC News/Ipsos-ի նոր հարցման տվյալներով, ամերիկացիների մեծամասնությունը (53%)-ը կարծում է, որ ԱՄՆ նախկին նախագահ Դոնալդ Թրամփը պաշտոնապես մեղադրվում է քրեական հանցագործության մեջ և դիտավորյալ ինչ-որ հակաօրինական բան է կատարել։
Եվս 11%-ը կարծում է, որ նա գործել է օրենքի շրջանակից դուրս, բայց ոչ դիտավորյալ։ Եվ միայն 20%-ն է կարծում, որ Թրամփը ոչ մի վատ բան չի արել, իսկ 16%-ը հայտարարել է որ չգիտի։
ԱՄՆ նախկին նախագահի դեմ երեքշաբթի առաջադրված մեղադրանքների շրջանակում Մանհեթենի դատախազները պնդում են, որ Թրամփը մասնակցել է 2016 թ․ նախագահական ընտրարշավի ընթացքում հաղթելու իր հնարավորությունը մեծացնելու սխեմային՝ իր ընտրարշավը պաշտպանելու համար այլ անձանց կողմից դրամական վճարումների միջոցով, իսկ հետո «քանիցս և խարդախորեն կեղծել է Նյու-Յորքի գործնական փաստաթղթերը», որպեսզի թաքցնի այդ հանցավոր արարքը։
Մեղադրական եզրակացությանը կցված 34 կետով «փաստերի շարադրանքում» պնդում է արվում, որ Թրամփն այս սխեման քննարկել է՝ գտնվելով Օվալաձև աշխատասենյակում, և ողջ տարվա ընթացքում, լինելով իր պաշտոնին, իր փաստաբանին փոխհատուցում է վճարել։
Թրամփն իրեն մեղավոր չի ճանաչել մեղադրանքի բոլոր 34 կետերով և երկար ժամանակ հերքում էր ցանկացած իրավախախտում։
