Տպել
Ֆրանսիայի առաջին տիկին Բրիջիտ Մակրոնը խնամքի տակ կվերցնի մեծ պանդայի երկու ձագերի, որոնք օրերս լույս աշխարհ են գալու «Բովալ» կենդանաբանական այգում, որը գտնվում Է Ֆրանսիայի Լուար եւ Շեր դեպարտամենտում: Այդ մասին հայտնել է կենդանաբանական այգու մամուլի քարտուղար Դելֆին Դելորը՝ հանդես գալով RMC ռադիոկայանի եթերում:
Ենթադրվում է, որ նախագահի տիկինը կստանձնի նորածիններին կենդանաբանական այգում պահելու հովանավորչական պարտավորություններ: Առաջին հերթին խոսքը վերաբերում է կերի հետ կապված ծախսերին եւ անհրաժեշտության դեպքում բժշկական օգնություն ցուցաբերելուն: Մակրոնը նաեւ ամբողջական տեղեկատվություն կստանա իր խնամարկյալների առողջական վիճակի եւ կենդանաբանական այգում նրանց պահելու պայմանների վերաբերյալ:
Դելորը նշել է, որ պանդայի ձագերի հայտնվելն իսկական պատմական իրադարձություն Է Ֆրանսիայի համար:
Էգ Խուան Խուանը եւ արու Յուան Ցզին, որոնց ինը տարին շուտով կլրանա, 2012 թվականի հունվարին Ֆրանսիայի կենդանաբանական այգի են բերվել Փարիզի եւ Պեկինի միջեւ կնքված համաձայնագրի շրջանակներում:
«Երբ իմացանք, որ մեր կենդանաբանական այգում պանդայի ձագ է հայտնվելու, մեր ուրախությանը սահման չկար, բայց երբ մի քանի օր առաջ սքրինինգը ցույց տվեց, որ երկվորյակներ են սպասվում, դա մեզ համար մեծ անակնկալ դարձավ»,-պատմել է Դելորը:
Պլանավորվում է, որ նորածինների անունները կդնի ՉԺՀ-ի առաջին տիկին Պեն Լիյուանը: Ֆրանսիական կենդանաբանական այգու եւ Չինաստանի միջեւ ստորագրված պայմանագրի համաձայն, ծնվելուց երկու-երեք տարի անց երկվորյակները պետք է վերադարձվեն Չինաստանին:
«Բովալ» կենդանաբանական այգին, որն ստեղծվել է 1980 թվականին, խոշորագույններից մեկն է Եվրոպայում: Նրա 35 հեկտար տարածքի վրա ներկայում ապրում են շուրջ հինգ հազար տեսակի կենդանիներ, որոնցից շատերը համարվում են հազվագյուտ եւ գտնվում պահպանության ներքո:
Ֆրանսիայում պանդաներ չեն եղել այն պահից, երբ 2000 թվականին սատկեց Յեն Յեն արջը: Նրան Չինաստանի վարչապետ Չժոու Էնլայը Ֆրանսիայի նախագահ Ժորժ Պոմպիդուին էր նվիրել 1973 թվականին, հաղորդել է ՏԱՍՍ-ը:
