Տպել
Life.panorama.am-ի զրուցակիցն է դերասան Դավիթ Մարդյանն, ով այս շրջանում նկարահանվում է Դիանա Գրիգորյանի նոր՝ «Նռան հատիկ» հեռուստասերիալում:
Դերասանը մեզ հետ զրույցում պատմել է առաջարկն ընդունելու պատճառների, ինչպես նաև իր կերպարի առանձնահատկությունների մասին:
«Երբ առաջարկը ստացա, մի քանի պատճառներ ունեի այն ընդունելու համար: Նախ գլխավորը՝ կրկին վերադառնում էի ինձ հարազատ մի թիմ, որտեղից սկսվեց իմ գործունեությունը այս ոլորտում: Ես շատ լավ գիտեմ Դիանա Գրիգորյանի թիմի աշխատելաոճը, այստեղ ինձ լիարժեք ու լավ եմ զգում: Առաջարկն ընդունելու պատճառներից մեկն էլ «Արմենիա հեռուստաընկերության» փաստն էր, որը ևս իմ ամենասիրելի հեռուստաալիքն է»,- նշեց Դավիթը:
Մեր նկատառմանը, որ ինչպես ամեն անգամ, այս հեռուստասերիալում ևս կրկին գլխավոր հերոսի ընկերոջն է մարմնավորում, և հարցին, թե ինչի՞ հետ է դերասանը կապում այդ հանգամանքը, պատասխանեց.
«Այո, ինչպես իմ բոլոր դերերում, այս անգամ էլ մարմնավորում եմ գլխավոր հերոսի ընկերոջը, սակայն կերպարս մնացած հերոսներից տարբերվում է իր տեսակով: Այդ հանգամանքը կես կատակ, կես լուրջ կապում եմ այն փաստի հետ, որ իրական կյանքում ևս գլխավոր հերոսների հետ մտերիմ ընկերներ ենք: Այս ընթացքում միայն Միհրան Ծառուկյանի հետ նախկինում ընկերներ չենք եղել, բայց հեռուստասերիալից հետո մտերմացանք»:
Խոսելով «Նռան հատիկ»-ում իր մարմնավորած կերպարի մասին՝ Դավիթը պատմեց.
«Հերոսս՝ Գոգան, մարզպետի տղայի ընկերն է, ով ևս ուզում է հարուստ կյանքով ապրել: Նա հակասական կերպար է. ինչ-որ հանգամանքներում շատ անխիղճ է, որոշ իրավիճակներում էլ շատ խղճով, նա և երես առած է, և այդպիսին չէ: Նրա բնավորության թաքուն կողմերը ընթացքում հեռուստադիտողը կբացահայտի: Շատ կցանկանայի, որ կերպարս ավելի դրական լիներ, բայց, կարծում եմ, իրականում սյուժեն կառուցված է այնպես, ըստ որի Գոգան օգտվում է ստեղծված իրավիճակից և ընկերոջ դիրքից»:
Դավիթ Մարդյանն ու Հայկ Չոմոյանն իրական կյանքում ևս մտերիմ ընկերներ են: Հարցին, թե նրանց ընկերությունը նկարահանման հրապարակում օգնում, թե խանգարում է, պատասխանեց.
«Միանշանակ, օգնում է: Իհարկե, մեր կերպարները մեզ հետ ոչ մի կապ չունեն, մենք ազնիվ ու սրտացավ ընկերներ ենք, բայց, ինչ խոսք, հաճելի է, երբ աշխատանքդ անցնում է ընկերական շրջապատում: Ի դեպ՝ մեզ մոտ հրաշալի դերասանական կազմ է հավաքված, իրար շատ լավ ենք հասկանում, ուրախ եմ, որ մինչ այսօր ոչ մի խնդիր չի առաջացել»:
