Advertisement 1000 x 90

Չեմ վիրավորվում, բայց կարծում եմ, որ անցածս ուղին վաստակավոր է. Սոնա Շահգելդյան. asekose.am

Asekose.am-ը զրուցել է երգչուհի Սոնա Շահգելդյանի հետ, ով զրույցի ընթացքում անդրադարձել է վաստակավոր արտիստի կոչում ստացած արտիստներին, ինչպես նաև այն փաստին, որ ինքը նրանց ցանկում չի եղել.

«Չգիտեմ, ապագայում կստանամ վաստակավոր արտիստի կոչում, թե ոչ, բայց մի բան հաստատ է՝ երբ այդ կոչմանն արժանանամ, անպայման պիտի հարց ուղղեմ ու հասկանամ, թե ինչի համար եմ ստանում, արդյո՞ք արժանի եմ այդ կոչմանը, թե ոչ: Չեմ վիրավորվում, բայց ինքս իմ մասին պետք է ասեմ, որ կարծում եմ անցածս ուղին վաստակավոր է»:

Երգչուհի, շնորհավորելով վաստակավորի կոչում ստացած իր կոլեգաներին, խոստովանեց, որ իր՝ վաստակավոր արտիստի կոչմանը չարժանանալն իրեն չի տխրեցում, քանի որ իր համար կան շատ ավելի առաջնային և կարևոր արժեքներ.

«Առհասարակ, ես համեստ երգչուհի ու մարդ եմ, ժողովուրդն ամեն ինչ շատ լավ տեսնում է, գիտի, թե ով է արժանի բարձր կոչումների, իսկ ով՝ ոչ. սա է ինձ համար ամենակարևորը: Բավական երկար տարիներ եմ երգում ու մեծ ճանապարհ եմ անցել,  ժողովրդի սերն ու  «Նոր ալիք» մրցույթում առաջին տեղը զբաղեցնելը, կարծում եմ` ամենամեծ վաստակն է: Սրանք են իմ համար թերևս առաջնայինը, մնացածն ինձ համար մեկ է, ուշադրություն չեմ դարձնում նման բաների: Շատ ու շատ արժանի մարդիկ կան, ովքեր ևս չեն ստացել վաստակավորի կոչում: Բոլոր դեպքերում չմոռանամ շնորհավորել կոլեգաներիս՝ ցանկանալով նորանոր հաջողություններ»:

Սոնա Շահգելդյանը մեզ հետ զրույցում նշեց, որ օրեր առաջ մասնակցել է Արամ Խաչատրյան համերգասրահում կայացած   ԽՍՀՄ ժողովրդական արտիստ Իոսիֆ Կոբզոնի համերգին, ինչն իր համար մեծ պատիվ է եղել.

«Կոբզոնին տեսել էի դեռ վաղուց` «Նոր ալիք» մրցույթի ժամանակ, և ինձ համար մեծ պատիվ ու հպարտություն էր նման մարդկանց հետ համերգների մասնակցելը, կենդանի հնչողությամբ կատարեցի Առնո Բաբաջանյանի “Верни мне музыку” երգը և շատ ջերմ ընդունելության արժանացա հանդիսատեսի կողմից»:

Զրույցում Սոնան նշեց, որ տարվա ավարտը ևս իր համար ստեղծագործական ակտիվ գործունեությամբ է աչքի ընկնելու.

«Ինչպես գիտեք, ես չեմ դադարում աշխատել, ամեն անգամ նոր կերպ եմ ներկայանում: Այս տարի ևս շատ աշխատեցի, մի քանի օրից ևս մեկ նոր՝«Դարերի շունչ» տեսահոլովակս կներկայացնեմ: Ինչպես նաև շատ ու շատ անակնկալներ կլինեն իմ շատ սիրելի հանդիսատեսի համար»: