Տպել
Սոթքի ոսկու հանքից մոտ կես տոննա ոսկի է անհետացել։ Վարչապետը հանձնարարել է ստուգումներ անցկացնել, որի արդյունքում պատկան մարմինները խախտումներ են հայտնաբերել։ Պատասխանող կողմը հերքում է ուսումնասիրության արդյունքները։
ՀՀ վարչապետ Կարեն Կարապետյանը կանաչ քարտ է տվել հարկային մարմիններին, որպեսզի ստուգումներ անցկացնեն «ԳեոՊրոՄայնինգ Գոլդ» ընկերությունում, որը Սոթքի ոսկու հանքում արդյունահանում իրականացնելու իրավունք ունի։ Այս մասին Sputnik Արմենիայի հետ զրույցում պատմեց բնապահպանության և ընդերքի տեսչական մարմնի իրավական աջակցության և վերլուծության բաժնի պետ Հովհաննես Մալխասյանը:
Ստուգող տեսուչները պարզել են, որ մոտ 500 կգ ոսկի պետք է ընկերությունը արդյունահաներ և իրենց փաստաթղթերում ներառեր։ Մինչդեռ նրանց փաստաթղթերում ոսկու քանակը չի երևացել, ինչը համապատասխան ակտով արձանագրվել է, ակտը ներկայացվել է տնտեսվարող սուբյեկտին` ընկերությանը։
«Նա ակտը բողոքարկելու` օրենքով սահմանված հնարավորություն ունի։ Վերադասության կարգով բողոք է ներկայացրել ՀՀ էներգետիկ ենթակառուցվածքների և բնական պաշարների նախարարին։ Դա համապատասխան հրամանով նույնպես մերժվել է, և ակտը թողնվել է օրինական ուժի մեջ։ Ընկերությունն օգտվել է իր դատական պաշտպանության իրավունքից և նաև վարչական դատարան է դիմել, որպեսզի և՛ նախարարի հրամանը, և՛ ուսումնասիրությունը ճանաչվի անվավեր»,- պատմեց Մալխասյանը։
Վարչական մարմինը վստահ է, որ իր կատարած հաշվարկները ճիշտ են, և ընկերությունն իրականում խախտում է թույլ տվել։ Իսկ ընկերության պատասխանատուները հերքում են` նշելով, որ առավելագույնը 8 կգ ոսկու կորուստ կա։
Այն ընթացքում, երբ ոսկու կոստի վերաբերյալ դատական քաշքշուկներ են ընթանում, Գեղարքունիքի մարզի Սոթք գյուղում գոհ ու երջանիկ են ապրում։ Sputnik Արմենիայի հետ զրույցում գյուղապետ Կոլիկ Շահսուվարյանը ծիծաղով նշեց` մենք ամենահարուստ գյուղացիներն ենք, թող բոլորը նախանձեն։
«Իրականում ոսկու հանքը մեզ շնորհքին հողի հարկ է տալիս, որի շնորհիվ գյուղը ծաղկեցնում ենք։ Այդ պահով են մեզ նախանձում։ Պրինցիպի ես նկատում եմ, որ դուք էլ եք նախանձում։ Իսկ հարևան գյուղերը չեն նախանձում, տրաքվում են»,- ծիծաղով նշեց գյուղապետը։
Նա հային հատուկ հյուրընկալությամբ առաջարկեց` մի օր այցելեք մեզ ու մեր ոսկիները տեսեք, մենք էլ ձեզ լավ կհյուրասիրենք ու կճանապարհենք։
