Տպել
1,07 տոննա կշռող դդումն ամենածանրն է ճանաչվել ամենամյա համազգային մրցույթի անցկացման ողջ պատմության ընթացքում, որը կայացել է Կալիֆոռնիայի նահանգի Սան Ֆրանցիսկո քաղաքի մերձակայքում:
Ինչպես հայտնել է AP գործակալությունը, մոտավորապես 16,5 հազար դոլարի չափով դրամական մրցանակը հանձնվել է Վաշինգտոնի նահանգի ֆերմեր Ջոել Հոլլանդին, որի համար այս հաղթանակն արդեն յոթերորդն է դարձել 44-րդ անգամ անցկացված մրցույթում:
Հսկայական պտուղը հարկ է եղել կշեռքի վրա դնել ավտոբեռնիչի օգնությամբ: Կշռելու արարողությունը դիտել են հարյուրավոր հանդիսականներ: Հոլլանդի ռեկորդային ծանր դդումը կշռել են վերջինը: Մինչ այդ բոլորը վստահ էին, որ կհաղթի անցյալ տարվա առաջատարը՝ Վաշինգտոնի նահանգի դպրոցի ուսուցչուհի Սինդի Թոբեքը:
Այն ժամանակ նա աճեցրել էր 866,4 կիլոգրամ քաշով դդում, և նրա մրցանակը կազմել էր 11,5 հազար դոլար՝ քաշի յուրաքանչյուր ֆունտի (0,453 կիլոգրամ) դիմաց՝ 6 դոլար: Այս տարի միջոցառման կազմակերպիչները որոշել են ֆունտի դիմաց պարգևը բարձրացնել մինչև 7 դոլար:
Այս անգամ Թոբեքն իր հետ բերել էր 908 կիլոգրամ կշռող դդում, բայց երեք ժամ տևած մրցույթի արդյունքներով զբաղեցրեց երկրորդ տեղը: Մրցությանը մասնակցել են Օրեգոնի, Վաշինգտոնի և Կալիֆոռնիայի նահանգների 20-ից ավելի ֆերմերներ: Մրցույթին ներկայացված ամենաթեթև դդումն այս տարի կշռել է 100 կիլոգրամից փոքր-ինչ ավելի, հաղորդել է ՏԱՍՍ-ը:
