Տպել
Երևանի թիվ 11 պոլիկլինիկա այցելած 32-ամյա Հռիփսիմե Զաքարյանն այնտեղից վերադարձել է զարմացած իր հանդեպ ցուցաբերած անօրինական վերաբերմունքի պատճառով:
Ինչպես հայտնում է ֆոտոլրագրող Գագիկ Շամշյանը, Հռիփսիմեից պոլիկլինիկայում պահանջել են գումար՝ բժշկական ուղեգիր տրամադրելու համար ( 2000 դրամ): Կինը ապրում է վարձակալությամբ Արամ Խաչատրյան 99 տան 1 սենյակում, որը մոտ 14 քմ մակերես ունի:
Միայնակ մեծացնում է երկու անչափահաս երեխաների, ունի 3-րդ կարգի հաշմանդամություն. միակ ապրուստի միջոցը թոշակն ու նպաստն է: Փոքր երեխան՝ որը 2,5 ամսական է, սնվում է կովի կաթով, քանի որ արհեստական կերերը թանկ են և անհասանելի, իսկ մոր կաթով սնվելու դեպքում երեխան նույնպես կարող է հիվանդանալ նույն հիվանդությամբ, ինչով մայրն է հիվանդ: Վերջում միայնակ մայրը խնդրեց Առողջապահության նախարարությանը ուշադրություն դարձնել այս հարցին և աջակցել, որպեսզի անվճար հետազոտություն անցնի և բուժում ստանա:
Այն սրտացավ ու բարի մարդիկ, որոնք կցանկանան օգնության ձեռք մեկնել դժվարին կացության մեջ հայտնված, ցուրտ ու խոնավ տանը ապրող ընտանիքին, կարող են զանգահարել հետևյալ հեռախոսահամարով՝ 094-19-99-53:
