Տպել
Արցախցի երիտասարդ երգչուհի Էռնա Միրը (Միրզոյան), ով «Նոր Ալիք» մրցույթում երեք օրերի արդյունքում ստանալով 362 միավոր՝ Հայաստանին հաղթանակ ապահովեց, Life.panorama.am-ի զրուցակիցն է:
Երգչուհին նշեց, որ թեև մրցույթից մեկ ամիս է անցել, բայց շարունակում է հաճելի տպավորություններով ապրել.
«Արդեն վաղուց մրցույթն ավարտվել է, բայց դեռ ինձ թվում է, թե նորից պետք է դա կատարվի ինձ հետ: Դեռ մանկուց էի ցանկանում հայտնվել այդ բեմում և իմ մասնակցությունը, որը հաղթանակով գրանցվեց, ասես երազանքի իրականացում լինի: Այնտեղ ամեն ինչ հեքիաթային էր ինձ թվում, քեզ ասես աստղ էիր զգում. բոլորը աշխատում էին քեզ համար, ուզում էին քեզ հետ հարցազրույցներ անցկացնել: Հիմա շատ եմ կարոտում այդ ամենը, նաև հանդիսատեսի չափազանց մեծ ջերմությունը»,- նշեց Էռնան ու շեշտեց՝ գնացել էր հնեց հաղթելու.
«Առաջ մտածում էի, թե կարևորը մասնակցությունն է, բայց հիմա այլևս այդպես չեմ կարծում: Ես ու մեր պրոդյուսեր Լիռա Քոչարյանը, ի սկզբանե ներկայացնելով իմ մասնակցության հայտը, գնում էինք հաղթելու և փառք Աստծո, դա ստացվեց մեզ մոտ: Մրցույթից առաջ մենք ամեն օր խոսում էինք այդ մասին, և անկեղծ ասեմ՝ իմ մեջ զգում էի, որ առաջին հորիզոնականն եմ վերցնելու»,- պատմեց նա:
Էռնա Միրը առանձնահատուկ անդրադարձավ «Նոր ալիքի» հանդիսատեսին.
«Միշտ եմ ասել՝ ես սիրում եմ իմ հանդիսատեսին և կապ չունի նրանց ազգությունը: Ինչ խոսք, իմ ամենամեծ երազնանքն է շրջագայել աշխարհով մեկ և ելույթ ունենալ տարբեր երկրներում ապրող մեր հայ հանդիսատեսի համար: «Նոր ալիքի» հանդիսատեսը շատ ջերմ էր, նրանք իրենց ժպիտներով անընդհատ ինձ հանգստացնում էին: Ի դեպ՝ մի գաղտնիք բացեմ. մինչ բեմ դուրս գալը ես շատ եմ լարվում, մի խաչ ունեմ, որ կուլիսներում միշտ ձեռքիս է, այն ինձ ուժ է տալիս, իսկ երբ բարձրանում եմ բեմ, հանդիսատեսն է կարողանում ինձ ազատել լարվածությունից: Այսինքն, ի տարբերություն այն մարդկանց, ովքեր լարվում են հանդիսատեսից, ինձ մոտ ճիշտ հակառակն է: Նրանք ինձ մեծ էներգիա և էմոցիաներ են փոխանցում, հենց դա էլ բեմում իմ ինքնավստահության պատճառն էր: Իհարկե, մրցույթներում շատ կարևոր է ժյուրիի համակրանքը, սակայն երգիչը ողջ կյանքում ժյուրիի համար չի երգելու, ամենակարևորը հանդիսատեսն է»,- ընդգծեց երգչուհին:
Խոսելով մրցույթում իր և Սյուզաննա Մելքոնյանի հարաբերություններից, Էռնան նշեց.
«Ես միշտ ասել եմ, որ երկու պետություն էի ներկայացնում՝ Հայաստանը և ԼՂՀ-ն: Իհարկե, դժվար էր, երբ հանգամանքները բերել էին նրան, որ ես մրցում էի նաև իմ հայրենակցի դեմ: Լավ էր գոնե, որ մենք տարբեր էինք մեր ոճերով և ժանրով: Նա շատ տաղանդավոր երգչուհի է, նրան շատ եմ սիրում և հարգում: Ես չեմ փորձել Սյուզաննայից լավ երգել, ես պարզապես ուզում էի, որ այնտեղ ճիշտ հասկանային իմ ոճը: Ուրախ եմ, որ Սյուզաննան ևս շատ սիրվեց այնտեղ ու կրկին հաղթական հորիզոնական գրավեց: Այնտեղ բոլորն էլ գնացել էին հաղթելու, և ես այդ թվում: Ու չնայած մրցույթում ինձ համար հրաշալի ընկերներ ձեռք բերեցի, որոնց հետ շատ ջերմ կապեր ունեմ, միևնույն է, ես, ինչպես բոլորը, ուզում էի հաղթել և իմ երկիրը պատվով ներկայացնել»:
Էռնա Միրը նոր հաղթանակից ոգևորված՝ ցանկություն ունի էլ ավելի ակտիվ գործել.
«Ուրախ եմ, որ հաղաթանակից հետո ունեմ մի շարք հրավերներ՝ մասնակցելու տարբեր համերգների, հաղորդումների: Այս ամենն ինձ շատ մեծ էներգիա է հաղորդում: Ես մեծ հաճույքով եմ անդադար երկար ճանապարհ կտրում ու Արցախից գալիս Երևան: Շուտով համերգ է նախատեսվում նաև Կրասնոդարում: Ամեն մի հրավեր հուշում է, որ մեր թիմի՝ «Արցախի ձայներ»-ի աշխատանքը գնահատվում է: Ի դեպ՝ իմ հաղթանակը վերագրում եմ հենց նրանց՝ ի դեմս Լիռա Քոչարյանի: Հիմա մենք կենտրոնացած ենք փոքրիկ ղարաբաղցի Միշայի վրա, ով Հայաստանը կներկայացնի «Մանկական եվրատեսիլ»-ում: Դե իսկ ես էլ պատրաստվում եմ նոր տեսահոլովակի մասին մտածել, բայց այդ մասին ավելի ուշ կխոսեմ»,- ավարտեց երգչուհին:
