Տպել
«Վավերագրեր Ռոմանովների դարաշրջանից» խորագրով ցուցահանդեսին կներկայացվեն երաժշտագետ, երաժշտական քննադատ, կոլեկցիոներ Վասիլի Կորգանովի (Բարսեղ Ղորղանյան) հավաքածուից Ռոմանովների արքայատոհմի 1670-1917թթ. ժամանակաշրջանին վերաբերող բացառիկ փաստաթղթեր: Այն կբացվի նոյեմբերի 13-ին Երևանի Մոսկվայի տանը, կգործի մինչև նոյեմբերի 17-ը:
«Արմենպրես»-ի հաղորդմամբ` կցուցադրվեն Պետրոս II-ի, Եկատերինա II-ի, Պավել I-ի, Ալեքսանդր I-ի, Ալեքսանդր II-ի ինքնագրերը, Լյուդովիկոս XIV թագավորի նամակը Պետրոս I-ին, Նապոլեոն I-ի՝ գահից երկրորդ հրաժարականը (գրված Ալեքսանդր I-ի և դաշնակիցների դրդմամբ), ռուսաստանյան պետական և քաղաքական ակնառու այլ գործիչների վավերագրեր, ինչպես նաև Կորգանովի կյանքն ու գործունեությունը ներկայացնող անձնական լուսանկարներ և արխիվային այլ նյութեր:
Ցուցահանդեսը ներկայացնում է Եղիշե Չարենցի անվան գրականության և արվեստի թանգարանը:
