Տպել
Միհրան Լատիֆյանը, համարվում է Ռիո դե Ժանեյրոյի ժամանակակից տեսքի գլխավոր ճարտարապետներից մեկը և հեղինակը: Միհրան Լատիֆյանը, ով առավել հայտնի է որպես Միհրան Լատիֆ, տեղափոխվել և բնակություն է հաստատել Բրազիլիայում 1878թ.-ին: Նա համարվում է Բրազիլիա ոտք դրած առաջին հայերից մեկը:
Լատիֆյանը ծնվել է 1856-ի մայիսի 20-ին Պոլսում, հայ ճարտարապետների ընտանիքում: Կրթությունը ստացել է Բելգիայի Կանտի համալսարանում: Այնուհետև տեղափոխվելով Բրազիլիա, գտնում է իր կյանքի միակ ու անբաժանելի սերը՝ Կինկասա Մոնտեյռու դի Բառոկային, որի հետ ամուսնանալով, ապրում է մինչև խոր ծերություն:
1897-ի հոկտեմբերին Բրազիլիայի կառավարությունը որոշում է կայացնում Ռիոն մի ընդհանուր համալիրի մեջ ներառելու մասին: Հայտարարվում է մրցույթ՝ «Ռիոն, որպես մի ամբողջական, անբաժան քաղաք» լավագույն նախագիծ անվանակարգով: Հաղթում է Միհրան Լատիֆի նախագիծը և նա սկսում է ղեկավարել աշխատանքները:
Ըստ Լատիֆի ծրագրի ապագա Ռիոն իրենից ներկայացնում էր մի տարածք, որը շրջապատված էր օղակաձև, այլընտրանքային մայրուղիներով, որոնք պետք է թեթևացնեին քաղաքի ավտոճանապարհները: Բլուրների վրա գտնվող տարածքները միմյանց էին միանում զարդանախշ կամուրջներով և բազմաստիճան էստակադաներով՝ միացված ստորգետնյա թունելներին և գետնանցումներին:
Ընդամենը 16 ամսում Լատիֆը ստեղծեց հանրահայտ Պեյր Մարրի 70 մետր լայնություն ունեցող պողոտան: Դա հանդիսացավ ժամանակակից քաղաքաշինության դասական հիմքը՝ իր բոլոր առանձնահատկություններով, այդ թվում նաև ազգային:
Մատուցած ծառայությունների համար, Ճարտարապետը ստացավ «Ռոզա» ասպետի պատվավոր կոչումը:
Միհրան Լատիֆը մահացել է 1929 թվականին՝ 73 տարեկան հասակում, իր ծննդյան օրը՝ մայիսի 20-ին: Աղբյուրը՝ barev.today
