Տպել
Ամերիկաբնակ Ռիտա Բալյանը ներկայացնում է այլ երկրում հաջողության հասնելու գաղտնիքները։
Ամերիկայում մենեջմենթի և լիդերության գծով հայտնի մարզիչ Ռիտա Բալյան Ալենն իր ծնողների` Բեյրութից գաղթածների օրինակով 10 քայլ է ներկայացրել, որոնք կօգնեն հաջողության հասնել օտար երկրում։ Այս մասին գրում է Huffingtonpost-ը։
«Ծնողներս ինձ համար ոգեշնչման աղբյուր են եղել, նույնիսկ այն ժամանակ, երբ ես դեռ չէի գիտակցում դա»,- գրել է մի շարք հոդվածների հեղինակ, դասախոս և մենեջմենթի ու լիդերության գծով մարզիչ Ռիտա Բալյան Ալենն իր «Լիդերության 10 դաս հայ գաղթական ծնողներիցս» խորագրով հոդվածում։
Ռիտան երկու տարեկան է եղել, երբ 1960-ականներին ծնողների ու երկու ավագ եղբայրների հետ Լիբանանից Ամերիկա է տեղափոխվել։
«Անկախ նրանից, որ դժվար էր թողնել հիանալի համայնքը, ընկերների և բարեկամների սերը, ծնողներս ուրախ էին այդ շրջագայության և նոր կյանք սկսելու համար։ Քանի որ ինձնից առաջ շատերն են գաղթել ԱՄՆ և շարունակում են գաղթել նաև ինձնից հետո, մեր նախնիների փորձը կարող է բոլորիս արժեքավոր դաս տալ»,- նշում է նա։
Նրա խոսքով` Ամերիկայի գեղեցկությունը տարբեր մշակույթների, փորձի և հեռանկարների բազմազանությունն է։
«Գաղթական լինելով` ես միշտ գնահատել եմ այդ բազմազանությունը և շնորհակալ եղել ընձեռած հնարավորությունների համար…»,- ընդգծել է Բալյանը։
Նա ավելացրել է, որ հաջողության է հասել մեծ հավատի, ուժի, բացարձակ սիրո և անշահախնդիր առատաձեռնության շնորհիվ, որով նրան օժտել են ծնողները։
«Թեև ծնողներս այլևս չկան, և նրանք չեն կարող տեսնել իմ ձեռքբերումները, բայց առաջնորդ լինելու մի շարք դասեր են թողել, որոնց մասին ես ուզում եմ պատմել»,- ավելացրել է Բալյանը։
Մենեջմենթի գծով մարզիչը համոզված է, որ իր ծնողների կյանքը մի շարք փախստականների կօգնի նրանց կայացման ճանապարհին։
