Ընկերներով կերել-խմել են, վիճել… մանրամասներ Ալավերդիում տեղի ունեցած սպանության դեպքից

ՀՀ քննչական կոմիտեից հայտնում են, որ Լոռու մարզային քննչական վարչությունում ավարտվել է Ալավերդի քաղաքի բնակիչ Ռոման Պողոսյանի սպանության դեպքի առթիվ հարուցված քրեական գործի նախաքննությունը։ Ձեռնարկված քննչական գործողությունների արդյունքում պարզվել է սպանության շարժառիթը, առերեւույթ հանցագործություն կատարած անձի ինքնությունը։ Առաջադրվել է մեղադրանք:

2016թ. դեկտեմբերի 28-ին Ալավերդի քաղաքի Ջրավազան 80-րդ շենքի մոտ՝ մայթեզրին, բերանքսիվայր վիճակում, հայտնաբերվել է Լոռու մարզի բնակիչ, 1982թ. ծնված Ռոման Պողոսյանի դիակը՝ բռնության հետքերով։

Դեպքի առթիվ հարուցվել է քրեական գործ՝ Ռ.Պողոսյանի սպանության դեպքի առթիվ՝ ՀՀ քրեական օրենսգրքի 104-րդ հոդվածի 1-ին մասով, մշակվել քննչական պլան եւ ձեռնարկվել անհրաժեշտ քննչական եւ դատավարական այլ գործողություններ՝ տղամարդու մահվան բոլոր հանգամանքները պարզելու ուղղությամբ: Արդյունքում՝ պարզվել է ենթադրյալ հանցագործություն կատարած անձի ինքնությունը, ով հանդիսանում է Լոռու մարզի բնակիչ:

Նախնական քննությամբ փաստական տվյալներ են ձեռք բերվել առ այն, որ դեպքից առաջ տուժողը ծանոթների հետ մասնակցել է հացկերույթի, որի ժամանակ օգտագործել են նաեւ ալկոհոլ։ 2016 թվականի դեկտեմբերի 27-ին՝ ժամը 23։30-ի սահմաններում, տուժողի եւ հացկերույթի մասնակիցներից մեկի միջեւ առաջացել է վիճաբանություն, որը հետագայում շարունակվել է Ալավերդի քաղաքի Ջրավազան փողոցում:

Վիճաբանությունը վերածվել է ծեծկռտուքի, որի ժամանակ ենթադրյալ հանցագործություն կատարած անձը բութ, կոշտ առարկայով հարվածներ է հասցրել տուժողի մարմնի տարբեր մասերին, որի հետեւանքով ստացած մարմնական վնասվածքներից վերջինս մահացել է:

Մինչդատական վարույթում ձեռք բերված բավարար ապացույցների հիման վրա՝ Լոռու մարզի բնակչին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասի հատկանիշներով, նրա նկատմամբ որպես խափանման միջոց է ընտրվել կալանավորումը:

Նախաքննությունն ավարտվել է, եւ քրեական գործը՝ մեղադրական եզրակացությամբ, ուղարկվել դատարան: