Տպել
Բրիտանացի դերասանուհի Սոֆի Թյոռները, որը «Գահերի խաղը» սերիալում մարմնավորել է Սանսա Սթարքին, արդեն կարդացել է ավարտական եթերաշրջանի սցենարը: Նա սերիալի վերջաբանի նկատմամբ դերասանական կազմի արձագանքի մասին պատմել է The Hollywood Reporter-ին տված հարցազրույցում:
«Երբ բոլոր դերասանները հավաքվեցին, մենք արագորեն աչքի անցկացրեցինք սցենարը, և դա միաժամանակ դառն էր ու սրտառուչ: Ու նաև՝ շատ ծանր»,- նշել է Թյոռները: Նրա խոսքով՝ սցենարի եզրափակիչ մասում իրենք բարձրաձայն ընթերցել են «Գահերի խաղի ավարտը» արտահայտությունը, և գրեթե բոլորը հեծկլտացել են, իսկ հետո սկսել են ծափահարել սերիալի շոուրաներներին:
«Ամեն անգամ, երբ մենք ստանում ենք սցենարը, անորոշություն է առաջանում. «Մեռնելու եմ արդյոք այս եթերաշրջանում»: Այն, որ ես արդեն այսքան ժամանակ դիմացել եմ, ինձ անհավատալի է թվում՝ հաշվի առնելով մահերի քանակը սերիալում: Մենք մեր թեորիաներն ունեինք այն մասին, թե ինչ տեղի կունենա,- ով կմահանա, իսկ ով կհաղթի: Այժմ մենք հաստատ գիտենք»,- ընդգծել է դերասանուհին:
«Գահերի խաղը» 2011 թվականից թողարկվում է HBO ալիքով: Սանսա Սթարքը՝ Թյոռների դերակատարմամբ, լորդ Նեդ Սթարքի ավագ դուստրն է և սագայի գլխավոր հերոսուհիներից մեկը:
Սերիալի յոթերորդ եթերաշրջանն ավարտվել է օգոստոսի 28-ին, իսկ վերջին էպիզոդը հավաքել է ռեկորդային թվով դիտումներ: Ֆենթեզի սագայի եզրափակիչ մասը կթողարկվի 2019 թվականի սկզբին, սակայն պրեմիերայի ստույգ ամսաթիվը չի բացահայտվում:
