Տպել
Facebook-ի աշխատանքին հետևող մասնագետները եզրակացրել են, որ սոցիալական կայքը բացասական ազդեցություն ունի մարդու առողջության վրա։ Այս մասին փորձագետները գրել են հոդվածում, որը կոչվում է «Բարդ հարց․ արդյո՞ք սոցիալական կայքերում անցկացրած ժամանակը կարող է վնասել մեզ», հայտնում է ՌԻԱ Նովոստին։
Դևիդ Գինզբերգն ու Մոյրա Բուրկեն վերլուծել են մարդկանց պահվածքն ու որոշել, որ նորությունների պասիվ դիտումը բացասաբար է անդրադառնում մարդու հոգեբանական վիճակի վրա։
«Երբ մարդիկ երկար ժամանակ պասիվ կլանում են տեղեկատվությունը, հետո իրենց ավելի վատ են զգում», — նշված է հոդվածում։
Որպես օրինակ ներկայացվում է Միչիգանի համալսարանի ուսանողների շրջանում անցկացված փորձը։ Մի խմբին խնդրել են տասը րոպե շարունակ նորություններ կարդալ, մյուսներին՝ գրառումներ անել ու ընկերների հետ շփվել։ Օրվա վերջին առաջին խմբի ուսանողների տրամադրությունն ավելի ցածր է եղել, քան երկրորդ խմբի ուսանողներինը։
Այն մարդիկ, որոնք հղումները բացել են չորս անգամ ավելի հաճախ, քան միջին վիճակագրական օգտատերը, և միջինից երկու անգամ ավելի հաճախ են «հավանել» գրառումները, ավելի վատ հոգեվիճակի մեջ են հայտնվել։
Facebook-ի ուսումնասիրողները եզրակացրել են, որ «ուրիշների մասին առցանց ընթերցումը կարող է բացասական սոցիալական համեմատությունների հանգեցնել»։
Այնպես որ ընկերությունը հորդորում է Facebook-ում ավելի շատ ժամանակ անցկացնել, օրինակ, հին ընկերների հետ շփվել, փոքր խմբերում զրուցել կամ անմիջապես ընկերների հետ տեղեկություններ փոխանակել։ Ուսումնասիրողների կարծիքով՝ դա կարող է երջանկացնել օգտատերերին։
