Տպել
2017 թվականը հայկական շոու-բիզնեսի և մշակույթի ոլորտի ներկայացուցիչների համար լի էր հարսանիքներով, սակայն եղան նաև ամուսնալուծություններ, որոնք նույնպես չվրիպեցին լրատվամիջոցների ուշադրությունից: Ամենից շատ քննարկված բաժանությունները ներկայացնում ենք ստորև:
Հասմիկ Պապյան և Կոնրադ Կուեյն
«Բաժանումը սրտի բաց վիրահատություն է՝ առանց անեսթեզիայի… Խնդրում եմ ըմբռնումով մոտենալ այս պահին ինձ համար ստեղծված դժվար կացությանը և խուսափել ավելորդ հարցադրումներից: Ավելացնելու ոչինչ չունեմ… »,- ահա այս գրառմամբ հայտնի օպերային երգչուհի, ՀՀ ժողովրդական արտիստ Հասմիկ Պապյանը հայտնեց, որ 24 տարվա համատեղ կյանքից հետո իր և գերմանացի թատերագիր Կոնրադ Կուեյննի ճանապարհները բաժանվել են:
Օլյա Հակոբյան և Աբել Աբելյան
Աբել Աբելյանին և Օլյա Հակոբյանին հաջողվեց տևական ժամանակ հանրությունից գաղտնի պահել այն փաստը, որ այլևս միասին չեն: Նախկին ամուսիններն այսօր էլ նախընտրում են թեմային որևէ կերպ չանդրադառնալ՝ սահմանափակվելով միայն բաժանության լուրը հաստատելով: Դերասանուհին մեր սիրային բլից հարցերին պատասխանելիս էլ ասել է, թե կարծում է՝ այլևս ամուսնանալու ցանկություն չի ունենա: Նշենք, որ նրանք երկու որդի ունեն:
Անատի և Էդգար
Երբ համացանցում խոսակցություններ տարածվեցին Անատի Սաքանյանի և Էդգարի բաժանության մասին (հիշեցնենք՝ զույգն ամուսնացել էր այս տարեսկզբին), դերասանուհին շարունակում էր ոչ հերքել, ոչ էլ հաստատել լուրը, սակայն BRAVO.am-ի հետ զրույցում բացառություն արեց:
Տիգրան Մնացականյան և Լիանա Առաքելյան
BRAVO.am-ը նախորդ ամիս հայտնել էր, որ Տիգրան Մնացականյանը և Լիանա Առաքելյանն ամուսնալուծվել են: Կարճ ժամանակ անց դերասանը խոստովանեց, որ նոր սիրելի ունի՝ 19-ամյա Մարիամը, որի հետ էլ պատրաստվում է ամուսնանալ: Առաջին ամուսնությունից Տիգրանն ունի 13-ամյա որդի և 1-ամյա դուստր:
ՀՏ Հայկո և Սյուզի
Հայկ Մարգարյանը, նույն ինքը՝ ՀՏ Հայկոն, ևս ամուսնալուծվել է: Կարգավիճակի փոփոխությունը ռեփերը գրանցել է նաև իր ֆեյսբուքյան էջի համապատասխան հատվածում: Հայկն առաջին ամուսնությունից դուստր ունի:
Մարի Աքսել և Ալեքսեյ Պրոխորով
Մարի Աքսելն այսօր միայնակ է խնամում իր երկու երեխաներին: Մոդել-դիզայներն ամուսնալուծվելու որոշման համար լուրջ պատճառներ է ունեցել, որոնց մասին ամիսներ առաջ բարձրաձայնել է BRAVO.am-ի հետ զրույցում:
«7 տարվա համատեղ ամուսնական կյանքից հետո ես իմացա, որ իմ ամուսինն ապրում է երկակի կյանքով։ Ընտանեկան կյանքի ու արժեքների նկատմամբ մեր հայացքները չհամընկնեն։ Տնից անվերջանալի բացակայությունները, ալկոհոլը, դավաճանությունները, երեխաների դաստիարակությանը մասնակցելու ցանկություն չունենալն ու նրանց ֆինանսապես չապահովելը հանգեցրին այս ամենին»,-ասել է նա:
Սեդա և Սերոժ
Դերասանուհի Սեդա Շահնազարյանի սիրավեպն ամուսնությամբ չի պսակվել, սակայն ներառել ենք այս ցանկում, քանի որ աշնանը բաժանված զույգը միասին է եղել շուրջ երեք տարի, մինչդեռ վերոնշյալ ամուսնություններից մեկը չդիմացավ նույնիսկ մի քանի ամսվա փորձությանը: Գուշակեցիք արդյո՞ք՝ որ զույգի ամուսնությունն է եղել ամենակարճատևը:
