Տպել
Կոնտինենտալ լիգայի նշանավոր խաղացողներից մեկը` Սամվել Մնացյանը, ուրախ է, որ հարձակվողներ Արտյոմ Մանուկյանը, Ալեքսեյ Փոլադյանն ու Անդրեյ Ալտիբարմակյանը Ռուսաստանի հոկեյի երիտասարդական հավաքականի առաջատարներ են դարձել։ Այս մասին նա պատմել է Р-Спорт-ին։
«Մանուկյանին վաղուց եմ ճանաչում, խելացի տղա է։ Փոլադյանին ու Ալտիբարմակյանին ևս ճանաչեցի, քանի որ դիտում էի երիտասարդական սուպերսերիայի գրեթե բոլոր խաղերը։ Անկեղծ ասած, նրանք ինձ դուր եկան, ակնհայտորեն տարբերվում են այս մրցաշարում։ Հետաքրքիր է, իհարկե, որ հավաքականի առաջատարները հայեր են, բայց նրանք Ռուսաստանի անունից են հանդես գալիս։ Հիանալի է», — ասաց Մնացյանը։
«Ադմիրալ» հոկեյի Կոնտինենտալ լիգայի ակումբի պաշտպան Մնացյանի մոտ առանձնակի հպարտություն է առաջացրել այն, որ երիտասարդ մարզիկները կոտրել են կարծրատիպերը` ընտրելով և հաջողության հասնելով մի մարզաձևում, որն այդքան էլ մեծ տարածում չունի հայերի շրջանում:
«Դեռ տասը տարի առաջ ինձ մի տղա ասաց. «Դու հոկեյիստ չես լինի. հայկական ազգանուն ունես»։ Այդ ասածը հիշում եմ, երբ տենում եմ, թե ով է Ռուսաստան-Կանադա խաղերում որոշիչ բուլիտները կատարում», — նշեց հոկեյիստը։
Մանուկյանը, Փոլադյանն ու Ալտիբարմակյանը Ռուսաստանը կներկայացնեն ԱՄՆ-ում անցկացվող աշխարհի երիտասարդական առաջնությանը։
