Տպել
Իսպանիայի իշխանություններն ահաբեկչության դեմ պայքարի նոր քայլեր են մշակել, որը ներկայացրել է երկրի ներքին գործերի նախարար Խուան Իգնասիո Սոիդոն: Այս մասին հայտնում է «ՌԻԱ նովոստի»-ն:
«Ընթացիկ տարվա սկզբից Իսպանիայի իրավապահ մարմինները երկրի ներսում և նրա սահմաններից դուրս ձերբակալել են 77 մարդու, ովքեր կասկածվում են ահաբեկչական գործունեություն իրականացնելու մեջ: 2015թ. կեսերից, երբ Իսպանիայում մտցվել է ահաբեկչական սպառնալիքի 4-րդ մակարդակ, ձերբակալվել է 218 մարդ»,- հիշեցրել է Իսպանիայի ներքին գործերի նախարարը հակաահաբեկչական նոր փաստաթուղթը ստորագրած քաղաքական ուժերի հետ հանդիպմանը:
Հանդիպման ընթացքում նախարարը տեղեկություններ է հայտնել Բարսելոնայում և Կամբրիլսեում օգոստոսին իրականացված ահաբեկչությունների, ինչպես նաև դրանցից հետո ձեռնարկված քայլերի մասին: Նրա խոսքով` նման ողբերգությունները կանխելու ուղղությամբ պետք է աշխատանքի երկու ուղղություն լինի: «Առաջին` անհրաժեշտ է բնակչությանը տեղեկացնել քայլերի մասին, որոնք անհրաժեշտ է իրականացնել սպառնալիքի կամ ահաբեկչության դեպքում, երկրորդ` անհրաժեշտ է ձեռնարկել քաղաքական և իրավական գործողություններ: Մասնավորապես, կարևոր է օրենք ընդունել, որն իրավական հիմքեր կստեղծի համաեվրոպական ավիաընկերությունների ուղևորների մասին տվյալների փոխանակում իրականացնելու մասին համաձայնագիրը կյանքի կոչելու համար: Համաձայնագիրն այս տարի ուժի մեջ է մտել, որոշում է ընդունվել ստեղծել համաեվրոպական ռեգիստր, որը ֆիքսելու է Եվրոպական Միություն մտնող անձանց դեմքերը»,- ասել է Սոիդոն:
