Տպել
Տաք թեյի օգտագործումը սպիրտային խմիչքների և ծխելու հետ մեծացնում է կերակրափողի քաղցկեղի զարգացման հավանականությունը: Այսպիսի եզրակացության են հանգել National Natural Science Foundation of China-ի և National Key Research and Development Program-ի չինացի գիտնականները:
Հետազոտողները 9 տարի ուսումնասիրել են China Kadoorie Biobank (CKB) հետազոտությանը մասնակցած 30-ից մինչև 79 տարեկան 456 հազար մարդու առողջական վիճակը և սննդային սովորությունները: Այս ընթացքում նրանց մոտ հայտնաբերվել է կերակրափողի քաղցկեղի 1731 դեպք:
Գիտնականները պարզել են, որ նման օնկոլոգիան 5 անգամ ավելի հաճախ է հանդիպում հիվանդների մոտ, որոնք կանոնավորապես տաք թեյ են խմել և ամեն օր 15 գրամից ոչ պակաս ալկոհոլ են օգտագործել: Միևնույն ժամանակ, կերակրափողի քաղցկեղը 2 անգամ ավելի հաճախ է գրանցվում տաք ըմպելիքներ նախընտրողների շրջանում, որոնք նաև ծխել են:
Հետազոտության հեղինակների ենթադրությամբ՝ 65 աստճան Ցելսիուսից բարձր ջերմաստիճանով ըմպելիքները ներքին օրգաններին ջերմային վնասվածք են հասցնում, ինչը կարող է մեծացնել օնկոլոգիայի առաջացման հավանականությունը: Նրանք մարդկանց կոչ են անում զգույշ վերաբերվել չափազանց տաք հեղուկներին, հատկապես ծխախոտի և ալկոհոլի միաժամանակյա օգտագործման դեպքում:
Չինացի գիտնականների հետազոտությունը հրապարակվել է Annals of Internal Medicine ամսագրում:
