Տպել
Ռուս մարզիկ և հասարակական գործիչ Սերգեյ Բադյուկը, որը Սիրիայում Anna News թերթում աշխատել է որպես ռազմական թղթակից, ԳԱԼԱ հեռուստաընկերությանը տված հարցազրույցի ընթացքում պատմել է սիրիահայերի հետ ծանոթության մասին ՝ նշելով, որ Հալեպում զենքի գործարանների գրեթե բոլոր վարպետները հայեր են: Գրում է Armenia.im-ը:
«Հանասերի մոտակայքում մարտ էր ընթանում «Իսլամական պետություն» ծայրահեղական խմբավորման ահաբեկիչների դեմ, և մենք մեկնեցինք այնտեղ: Մարտի ավարտից հետո սկսեցինք շփվել մարտիկների հետ: Զենիթային ЗУ-23 համակարգի օպերատորի մոտ խաչ տեսա, ինչը զարմացրեց ինձ: Ես հարցրեցի նրա անունը: Եվ եթե չեմ սխալվում, նա Ռաֆայել ասաց: Ես ծիծաղեցի և հարցրեցի, թե արդյոք հայ է: Նա պատասխանեց՝ այո, և պատմեց, որ արդեն 2 տարի է կռվում է ստորաբաժանման կազմում»,- ասել է Սերգեյ Բադյուկը:
Նրա խոսքերով՝ տեխնիկական հմտություններ ունեցող բոլոր մասնագետները, ինչպես, օրինակ, հակատանկային հրթիռների կամ զենիթային համակարգերի նշանառու-օպերատորները, որպես կանոն, հայեր են:
«Նրանք տեխնիկապես շատ պատրաստված են: Ես ֆիլմ եմ նկարահանել Հալեպի գործարանների մասին, որտեղ զենք էին պատրաստում աշխարհազորայինների համար: Մենք ուղևորվեցինք այդ գործարաններից մեկը, և պարզվեց, որ ավագ վարպետը հայ էր: Այնուհետև պարզվեց, որ այդ գործարանների գրեթե բոլոր վարպետները հայեր են: Բացի այդ, Հալեպի արդյունաբերական շրջանի վարպետների 60-70%-ը հայկական սփյուռքի ներկայացուցիչներ են»,- պատմել է ռազմական թղթակիցը:
