Զարուհի Բաբայանի հուզմունքն ու «Երգի մոլորակ»-ի շնորհանդեսի չնախատեսված դրվագը

Զարուհի Բաբայանը վերջին շրջանում ջանք ու եռանդ չէր խնայում, որպեսզի իր ստուդիայի սաների առաջին` «Երգի մոլորակ» ձայնասկավառակի շնորհանդես-համերգը հիանալի անցնի: Կարեւոր օրը նրանք որոշել էին անցկացնել «Երևան Մոլ»-ում` իրենց ձայնը լսելի դարձնելով ոչ միայն հյուրերին, այլև առևտրի կենտրոնի բոլոր այցելուներին:

Մինչ միջոցառման մեկնարկը Զարուհին բավական հուզված էր, մյուս կողմից էլ քաջալերում էր իր սաներին: Նրանց ոգևորությունն ու լավ տրամադրությունը շարունակվեց նույնիսկ այն ժամանակ, երբ համերգի մեկնարկից րոպեներ անց սրահում անջատվեցին բոլոր լույսերը: Մթության մեջ, սակայն, չէին դադարում ծափերն ու բրավոները: Ի դեպ, սա առիթ հանդիսացավ, որ նա բեմ բարձրանա և սաների հետ շարունակի երգն ակապելլա տարբերակով:

Իսկ երբ համերգի բնականոն ընթացքը շարունակվեց, բացի սաների ելույթներից, երգչուհուն գեղեցիկ պարով շնորհավորեցին Սոֆի Դեւոյանի պարի ստուդիայի երեխաները: Զարուհին երեկոն ավարտեց իր «Հայաստան» երգով:

BRAVO.am-ի հետ զրույցում նա խոստովանեց, որ մեծ անհանգստությամբ և մտահոգությամբ է սպասել այս օրվան.«Այս ձայնասկավառակը ոչ միայն իմ աշխատանքն է, այլև երեխաների. ամփոփում ենք մեր 2-3 տարվա գործունեությունը: Երեխաները շատ ոգևորված են, իսկ ես այնպիսի տպավորություն ունեմ` ասես առաջին անգամ պետք է բեմ բարձրանամ»:

Երգչուհին նշել է, որ «Երգի մոլորակ» սկավառակում ընդգրկված բոլոր երգերը գրվել են հատուկ երեխաների համար. «Հաշվի ենք առել նրանց ցանկությունները, բնավորությունը, դրա համար էլ շատ տարբեր երգեր են ստացվել: Երգում են ամեն ինչի մասին` դպրոց, ընտանիք, ընկերություն, սեր, մոլորակ: Ինձ համար իսկապես շատ թանկ ձայնասկավառակ է»:

Թե բազմաթիվ սաներից ինչպես են ընտրվել նրանք, որոնց երգերը պետք է ալբոմում ընդգրկվեն, Զարուհին ասել է. «Նախ երեխան պետք է հասնի այն աստիճանի, որ կարողանա ինքնուրույն բեմ բարձրանալ, ներկայացնել երգ, այսինքն` պետք է անցնի ճանապարհ: Այստեղ այն երեխաներն են, ովքեր երկար ճանապարհ են անցել և կարող են երգել բեմում»: