Տպել
Պաշտոնական Բաքուն պատրաստ է բանակցել Հայաստանի նոր ղեկավարության հետ։
Բաքուն Հայաստանի նոր քաղաքական ղեկավարությանը կոչ է անում «չկրկնել իր նախորդների սխալները»։
Ադրբեջանի ԱԳՆ պաշտոնական ներկայացուցիչ Հիքմեթ Հաջիևի խոսքերն է փոխանցում ՌԻԱ Նովոստին` հավելելով, որ Ադրբեջանը պատրաստ է բանակցություններ վարել ղարաբաղյան հակամարտության կարգավորման թեմայով:
«Մենք դեռևս հույս ունենք, որ Հայաստանի նոր քաղաքական ղեկավարությունը չի կրկնի իր նախորդների սխալները, առողջ քաղաքականություն կվարի և կփորձի քաղաքակիրթ հարաբերություններ ստեղծել հարևանների հետ խաղաղ համատեղ գոյության համար»,- ասել է Հաջիևը:
Ադրբեջանցի պաշտոնիայի խոսքով՝ «հակամարտության կարգավորումը կծառայի տարածաշրջանում շարունակական խաղաղության և անվտանգության ապահովմանը։ Այն նաև բազմակողմ տարածաշրջանային համագործակցության համար հնարավորություններ կստեղծի, որից առաջին հերթին կօգտվի հայ ժողովուրդը»:
Հիշեցնենք, որ նախօրեին Հաջիևը տեղեկացրել էր, որ Բաքուն մտահոգված է Հայաստանի նորընտիր վարչապետ Նիկոլ Փաշինյանի հայտարարություններով ԼՂ հիմնախնդրի կարգավորման մասին:
Նիկոլ Փաշինյանը հայտարարել էր Ադրբեջանի իշխանությունների հետ ԼՂ հիմնախնդրի կարգավորման շուրջ բանակցություններ վարելու պատրաստակամության մասին, եթե Արցախը ևս բանակցային կողմ դառնա:
