Տպել
Շիրակի մարզում այսօր ակտիվորեն քննարկվում է մարզպետի ընտրության հարցը: Ինչպես արդեն գիտենք նախկին մարզպետ, դաշնակցական Արթուր Խաչատրյանը նշանակվեց գյուղատնտեսության նախարար: Մամուլում շատ անուններ հնչեցին, այդ թվում Գյումրիում հեղափոխության առաջամարտիկների՝ դասախոսներ Կարեն Պետրոսյանի և Ղարիբ Հարությունյանի, սակայն մեր տեղեկություններով այս պահին ամենահավանական թեկնածուն ԵԼՔ դաշինքի և Քաղաքացիական Պայմանագիր կուսակցության անդամ 32-ամյա Կարեն Սարուխանյանն է: «Հրապարակն» այս առիթով զրուցեց նրա հետ:
-Ձեզ հստակ առաջարկ արվե՞լ է՝ դառնալ Շիրակի մարզպետ, եթե այո, ո՞վ է առաջադրել:
-Իմ մարզպետի թեկնածու լինելու մասին տեղեկություններ ես ունեմ այնքան, որքան դուք: Դեռ պաշտոնական առաջարկ չի եղել, բայց կուսակցության որոշումից է կախված , կուսակցության ներսում խոսակցություններ ունեցել ենք:
-Եթե առաջարկն ստանա՞ք, պատրաստվում եք ստանձնել մարզպետի պաշտոնը:
-Էս պահին շտապ հայտարարություն չանեմ, առաջարկը կլինի, կմտածենք:
-Իսկ ի՞նչ եք կարծում, գլուխ կհանե՞ք, պատասխանատու պաշտոն է:
-Ես ծնունդով Գյումրեցի եմ և ինձ համար նորություն չէ քաղաքը, մարզը, ինչպես նաև առկա խնդիրներն ու այն ամենն ինչ վերաբերում է մարզին: Բայց նորից եմ ասում, դեռ շուտ է, որևէ բան ասել:
-Ձեր ֆեյսբուքյան էջում լուսանկարներ նկատեցինք Տարածքային կառավարման նախարար Սուրեն Պապիկյանի հետ:
-Այո, նա եկել էր Գյումրի մեզ հետ հանդիպման, ես ակտիվորեն մասնակցել են շարժմանը, Իմ քայլը նախաձեռնության անդամ եմ, և արդեն բավականին ժամանակ է կուսակցության մեջ եմ: Ընտրություններին կուսակցության Գյումրու շտաբի պետն եմ եղել:
-Իսկ քաղաքականության մեջ եք, քանի որ մասնագիտությա՞մբ եք քաղաքագետ, թե այլ մասնագիտություն ունեք:
-Ես մասնագիտությամբ կենսաբան եմ, ունեմ կենդանաբանության բակալավրի աստիճան, դպրոցում դասավանդում եմ, դասախոսում եմ նաև քոլեջում:
