Տպել
Մայիսի 16-ին կայացած ԱՀ 2017թ. պետական բյուջեի կատարման հաշվետվության քննարկումից հետո ԱԺ պատգամավորները գործադիր իշխանության ներկայացուցիչներին առաջադրել են բյուջեի կատարողականին վերաբերող մի շարք հարցեր:
«Դաշնակցություն» խմբակցության պատգամավորների հարցերը տարբեր ոլորտներից էին:
ԱԺ փոխնախագահ Վահրամ Բալայանը ողջունել է 2017 թվականին արձանագրված եկամուտների աճը՝ մատնանշելով սակայն մասնակի ֆինանսավորված մի քանի ոլորտ՝ քաղաքացիական պաշտպանություն՝ 74.3 տոկոս, արտակարգ իրավիճակների վարչություն՝ 61.2 տոկոս, գյուղատնտեսական միջոցառումների իրականացման ծրագրեր՝ 91.2 տոկոս, ջրամատակարարում՝ 88.2 տոկոս:
«Ինչով է պայմանավորված այս ոլորտների մասնակի ֆինանսավորումը» հարցին ի պատասխան՝ Գ.Մարտիրոսյանը նշել է, որ որեւէ ոլորտի գծով էական պարտավորություններ չեն կուտակել, իրականացված աշխատանքները ֆինանսավորվել են:
«Եթե առանձին-առանձին դիտարկենք, ապա նշեմ, որ ջրային ոլորտի կատարողականը մասնակի է ֆինանսավորել՝ հաշվի առնելով այն հանգամանքը, որ տվյալ ոլորտի ընկերությունները կարողացել են ապահովել իրենց տարեկան աշխատանքները, այդ թվում՝ սեփական եկամուտների հաշվին: Ասեմ նաեւ, որ գյուղատնտեսության նախարարությունը մասնակի սուբսիդավորել է մեխանիկական եղանակով ջրամատակարարումը եւ այլն,- ասել է Գ.Մարտիրոսյանը եւ ընդգծել,- սուբսիդավորման ծավալները 100 տոկոսով չեն իրականացվել, քանի որ այդ ֆինանսավորումը ինքնանպատակ չէ եւ հետապնդում է տվյալ կազմակերպությունների ֆինանսական վիճակի բարելավման նպատակ: Համանման հանգամանքներով է պայմանավորված նշված ոլորտներում ծախսերի 90 տոկոսից ցածր կատարողականը»:
Պատգամավոր Ալյոշա Գաբրիելյանը մտահոգություն հայտնեց 2017 թվականի ընթացիկ ծախսերի գծով ծառայությունների եւ ապրանքների ձեռքբերման հոդվածով տրամադրված միջոցների աճի վերաբերյալ: 2016-ի համեմատ՝ տվյալ ոլորտի աճը կազմել է 9.9 տոկոս կամ 887.349.0 հազար ՀՀ դրամ:
ԱՀ ֆինանսների նախարար Գրիգորի Մարտիրոսյանը, պատգամավորի հարցին ի պատասխան նշել է, որ տվյալ հոդվածով տրամադրվող միջոցների աճը համահունչ է ընդհանուր պետական բյուջեի ծախսերի աճին: «Այստեղ որեւէ արտառոց բան չի արձանագրվել: Պետական մարմիների տարբեր ծառայությունների կամ ապրանքների ձեռքբերման գծով ավելացումները պետական բյուջեի ծախսերի շրջանակներում էր: Որեւէ քաղաքականության փոփոխություն կամ դասակարգման փոփոխություն այստեղ չենք արձանագրել»,- իր խոսքում նշել է ֆինանսների նախարարը:
Ա.Գաբրիելյանի երկրորդ հարցը 2017 թվականին պետական բյուջեով նախատեսված՝ կառավարության պահուստային ֆոնդից պաշտոնաթող նախագահ Արկադի Ղուկասյանի գրասենյակի համար գույք ձեռք բերելու նպատակով 53.760.000 հազար ՀՀ դրամ տրամադրելու վերաբերյալ էր: «Մեր բյուջեի հաշվին այս շքեղությունը տարակուսանք է պատճառում՝ հաշվի առնելով նաեւ այն հանգամանքը, որ պաշտոնաթող նախագահը չի բնակվում Ղարաբաղում»,- ձեւակերպել է պատգամավորը: Գ.Մարտիրոսյանը հարցին նշել է, որ հարցին կպատասխանի քննարկումների ժամանակ՝ մանրամասները ճշտելուց հետո:
Աղբյուրը՝ ԱՊԱՌԱԺ, Ստեփանակերտ
