Տպել
Վրաստանում քրեական պատասխանատվության կարող են ենթարկել այն քաղաքացուն, որը ապրիլյան քառօրյայի ժամանակ սոցցանցերի միջոցով կոչ էր անում ներխուժել Թբիլիսիում Հայաստանի դեսպանատուն և պատանդ վերցնել դեսպանին (այն ժամանակ դեսպանի պաշտոնը զբաղեցնում էր Յուրի Վարդանյանը), հայտնում է ՌԻԱ Նովոստին` հղում անելով վրացական ԶԼՄ-ներին։
«Ինտերպրեսնյուս» գործակալության տվյալների համաձայն` գործի նյութերը գաղտնագրված են։ Վրաստանի քաղաքացուն մեղադրում են ահաբեկչության կոչ անելու համար։ Փաստաթղթերում գրված է, որ 2016 թվականին Facebook սոցցանցում մեղադրյալը Վրաստանում ապրող ադրբեջանցիներին կոչ է արել հավաքվել Հայաստանի դեսպանատան մոտ, այրել հայկական եռագույնը, ներխուժել շենք և դեսպանին պատանդ վերցնել։
Թեև կոչերին ոչ ոք չէր արձագանքել, սակայն երկու տարի անց ծայրահեղական բովանդակություն ունեցող գրառումների հեղինակի դեմ քրեական հետապնդում է սկսվել։
«Հետաքննությունն այս ընթացքում սպասում էր պաշտոնական հաստատման, այդ թվում Facebook սոցցանցից, այն մասին, թե իրականում ով էր գրառման հեղինակը», — «Ինտերպրեսնյուսին» է մեջբերում ՌԻԱ Նովոստին։
Քաղաքացուն պաշտոնական մեղադրանք է առաջադրվել, դատարանը նրան ազատ է արձակել գրավի դիմաց։ Նշված գործի վերաբերյալ դատական գործընթացը շարունակվում է։
