Վատ չէր նայվի Նիկոլ Փաշինյանը՝ ուսապարկով, ցուպը ձեռքին, աջից՝ Արարատ Միրզոյանը, ձախից՝ Լիլիթ Մակունցը. «Հայոց աշխարհ» (լուսանկարներ)
Advertisement 1000 x 90

Վատ չէր նայվի Նիկոլ Փաշինյանը՝ ուսապարկով, ցուպը ձեռքին, աջից՝ Արարատ Միրզոյանը, ձախից՝ Լիլիթ Մակունցը. «Հայոց աշխարհ»

Այն, որ երկրի գլխին եկած թավշահեղափոխական կառավարության անդամները չեն տառապում ավելորդ համեստությունից, կարծես առանց հավելյալ մեկնաբանությունների էլ պարզ է: Բայց ա՞յս աստիճան:

Հերթական սյուրպրիզը մատուցեց մշակույթի նախարար Լիլիթ Մակունցը: Յուր ֆեյսբուքյան գրառմամբ նա հանրությանը մասնավորապես ավետեց հետևյալը. «Տեղեկացնում եմ, որ Հայաստանի պատմության թանգարանում 5-օրյա ժամկետում կհատկացվի ցուցասրահ՝ նվիրված թավշյա հեղափոխությանը: Երկուշաբթի օրը աշխատանքային խումբը կապ կհաստատի թանգարանի տնօրեն պարոն Գրիգորյանի հետ և հնարավորինս սեղմ ժամկետներում կսկսի ցուցասրահը համապատասխան նմուշներով համալրելն ու կահավորելը: Ցուցասրահի պաշտոնական բացման մասին կտրամադրենք լրացուցիչ տեղեկատվություն»:

Չէ, բայց միտք է: Ցուցասրահում կլինեն Նիկոլ Փաշինյանի ցուպը, կպչուն ժապավենով շարքից հանված արագաչափը, վրանը, անձրևանոցը, գլխարկը, բոթասը, ձեռքի վիրակապը: Հա, անպայման «Մերսեդեսի» ձայնային ազդանշանի հարմարանք, վուվուզել, շերեփ և կաթսա, փողոց փակելու ժամանակ գործածված աղբաման, Չալոյի մոմե արձանիկը, բարձրախոս, «Ազատություն» ռադիոկայանի թղթակցի խոսափողը, կհնչի Հայկոյի ձայնը՝ «իշքա՜մ, շքա՜մ…»: Նիկոլ Փաշինյանի ձայնը՝ «Հայաստանի հպա՜րտ քաղաքացիներ…»: Մի խոսքով, ահագին ցուցադրելու թավշյա հանգամանքներ կան:

Հասկանալի է, իհարկե, որ Նիկոլ Փաշինյանը, անկախ նրանից, թե դա ում է դուր գալիս կամ ոչ, արդեն մտել է պատմության մեջ: Բայց, կարծում ենք, դեռ վաղ է, որ նրա գլխավորած թավշյա անցուդարձը մտնի Պատմության թանգարան: Մշակույթի նախարարը մի փոքր, այսպես ասենք, մի 5 տարի շտապել է: Ժամանակից առաջ է ընկել:

Թեպետ, կարելի է կանգ չառնել թանգարանային ցուցասրահի վրա: Պետք է կինոներ նկարել, գրքեր գրել, հեղափոխական ռաբիս երգերի ամենամսյա մրցույթ նախաձեռնել, թատերական ու կրկեսային ներկայացումներ, մարզական ու մշակութային միջոցառումներ: Ինչպես, ասենք, օրերս համացանցում տարածվել էր մանկապարտեզներից մեկում կազմակերպված ցերեկույթը, որի ժամանակ մորուսակիր պստիկը ժողվարչապետի դերն էր կատարում՝ «Իմ քայլը» մինի-ներկայացման մեջ:

Անպայման պետք է գեղանկարների ու քանդակների մրցույթ անցկացնել: Թեմաների պակաս չկա: Նկարել ցանկացող երեխաների ու նրանց ծնողների՝ ևս: Պետք է ի վերջո ստեղծագործական ճիշտ հուն ուղղորդել այդ ներուժը: Ի դեպ, հրապարակը պատվանդանի ու արձանի պակաս ունի: Վատ չէր նայվի Նիկոլ Փաշինյանը՝ ուսապարկով, ցուպը ձեռքին, աջից՝ Արարատ Միրզոյանը, ձախից՝ Լիլիթ Մակունցը, հայացքները պարզած դեպի պայծառ ապագա: