Տպել
«Բարի մամա» բարեգործական հասարակական կազմակերպության «Բարի տնակ» ներառական կենտրոնը, Անժելա Թանկյանը, Սերժ Թանկյանն ու Ջոն Դոլմայանը կազմակերպել են բարեգործական խաղարկություն:
Լաս Վեգասում անցկացվելիք համերգի խաղարկվող տոմսերից ցանկացածը կարող է շահել:
Երկու հաջողակ շահողները հնարավորություն կունենան իրենց իսկական ռոք-աստղ զգալ՝ զրուցել Սերժ Թանկյանի ու Ջոն Դոլմայանի հետ կուլիսներում, միասին ճաշել, ունենալ 2 դաս Ջոնի հետ ու հնարավորութուն ստանալ շահել Սերժ Թանկյանի drumset-ը:
Խաղարկության տոմսերի գինը սկսվում է 25 դոլարից, իսկ գումարն ուղղվելու է «Բարի տնակի» առաջին մասնաշենքն ավարտելուն ու երկրորդը կառուցելուն:
«Աճուրդ կազմակերպելն ու «Բարի տնակի» կառուցմանն աջակցելը Անժելա Թանկյանի միտքն էր, ով հանդիսանում է «Բարի մամա» ՀԿ-ի խորհրդի անդամ: Մենք զբաղվում ենք մանկատան հաշմանդամություն ունեցող երեխաներին աջակցելով, իսկ «Բարի տնակը» ապաստարան է այն մայրերի համար, ովքեր չեն ուզում հրաժարվել իրենց երեխաներից, բայց տեղ չունեն գնալու»,- մեզ հետ զրույցում նշեց «Բարի մամայի» հիմնադիր-նախագահ Մարինա Ադուլյանը:
«Այս աճուրդը մեծ հնարավորություն է «Բարի մամա» ՀԿ-ի համար, որ կարողանանք ստեղծել իր տեսակի մեջ եզակի համալիր, որտեղ մանկատներում արդեն իսկ ապրող հաշմանդամություն ունեցող երեխաները ոտքի կկանգնեն եւ լիարժեք կյանքով կապրեն, իսկ բազմաթիվ երեխաներ մանկատուն չեն հասնի: «Բարի տնակն» իսկապես մեծ հնարավորություն է տալիս Հայաստանը առանց մանկատների դարձնել եւ կարծրատիպերը կոտրել: Շնորհակալություն բոլոր մարդկանց, ովքեր միանում են մեզ այս դժվար ճանապարհին»,- հավելեց Մարինան:
Դե ինչ, այս խաղարկությունն իսկապես հրաշալի առիթ է հաճելին իրապես օգտակարի հետ համատեղելու համար:
