Տպել
Լոս Անջելեսում Վիլյամ Սարոյանի ծննդյան 110-ամյակի առիթով Կենտրոնական գրադարանը ներկայացնում է «Իմ անունն Արամ է» խորագրով ցուցահանդես, որը կգործի մինչև հոկտեմբերի 7-ը: Բացի այդ՝ Սարոյանի չհրապարակված պիեսներից կբեմադրվեն սեպտեմբերի 15-ին: Թե՛ ցուցահանդեսի, թե՛ ներկայացման մուտքն ազատ է հանդիսատեսի համար, հաղորդում է Asbarez-ը:
Ցուցահանդեսում կներկայացվի 45 նկար, ինչպես նաև մեծ դրամատուրգ, գրող և մարդասեր Վիլյամ Սարոյանի կյանքն ընդգծող մեջբերումներ, հայտնել է Լոս Անջելեսի հասարակական գրադարանի հետազոտական և հատուկ հավաքածուների բաժնի վարիչ Անի Բոյաջյանը: Ցուցահանդեսում ներկայացված կլինեն Սարոյանի երկու լուսանկարներ, որոնք արվել են լուսանկարիչ Պողոս Պողոսյանի կողմից 1976 և 1978 թվականներին Սարոյանի՝ Հայաստան կատարած այցերի ժամանակ:
Ցուցահանդեսը եզրափակելու է հանրահայտ ռեժիսոր Արամ Կույումջյանի «Վիլյամ Սարոյան. անտիպ պիեսների ներկայացում» նախագիծը: Բոյաջյանն այս առիթով ասել է, որ ուրախ է նոր սերնդին ներկայացնել Սարոյանին, որը ժամանակին համարվել է լավագույններից մեկը Հեմինգուեյի և Ֆիցջերալդի հետ միասին:
Ցուցահանդեսում ընդգծված մեջբերումները վերցվել են Սարոյանի՝ վեց տասնամյակի աշխատանքներից ու գրվածքներից: Նրա ամենահայտնի գործերի մի մասը կենտրոնացած է հայկական ծագման և սփյուռքի ինքնության վրա, ինչը հիմնավոր հարցեր է առաջ քաշում մարդկության ընդհանուր ցավի և աքսորի պարադոքսի մասին:
