Տպել
Արշալույս Զուրաբյանի գրառումը.
«Էսպիսի բան
Կանգնել ենք մարդու արժևորման ճանապարհին ու փորձում ենք վերագտնել հայրենիքը վերակերտելու հավաքական գիտակցությունն ունեցող ազգի կերպարը։ Այսուհետ մեր ներսում ուժով ու կարողություններով միմյանց խեղդելու և սեփական խնդիրներն այլոց հաշվին լուծելու փոխարեն պետք է մտահոգվենք մեզնից յուրաքանչյուրի ճակատագրով։ Այստեղից է սկսվում մարդասիրությունն ու հայրենասիրությունը։
Հասարակությունը պետք է դրսևորի ազատ ապրելու հաստատուն կամք, ստանձնի պատասխանատվություն, քանի որ առջևում փորձություններ են, իսկ անկախ ու իրավական երկիր կառուցելու ճանապարհին մեր թուլությունն ու անտարբերությունը հանգեցնելու է պետականության թուլությանը։
Քաղաքական վերնախավի վրիպումները կամ պարզամիտ ընկալումները կարող են ծնել պարզունակ աղետներ։ Հարկ է կյանքի կոչել հատուկ ինստիտուտներ, որպեսզի այսուհետ քաղաքական ու տնտեսական որոշումների հիմքում դրվեն լուրջ վերլուծություններ։
Ժամանակն աշխատելու է մեր օգտին կամ ի վնաս մեզ, և դա կախված է լինելու ոչ թե միջազգային «մութ ուժերի» որոշումներից, այլ բացառապես մեր ընկալումներից ու գործողություններից»։
