Տպել
«Փաստինֆո»-ի տեղեկություններով՝ «Մուրացան» ԲԿ-ում 1 տարեկան 9 ամսական գավառցի երեխային վիրահատությունից առաջ անասթեզիա ներարկելու և վիճակի կտրուկ վատացման փաստով ոստիկանությունում քրեական գործ է հարուցվել:
Դեռևս հուլիսի 27-ին «Մուրացան» ԲԿ ընդունված տղա երեխային բժիշկները հետազոտել են և երեխային վիրահատության նախապատրաստել՝ այդ նպատակով կատարելով անասթեզիա, սակայն որոշ ժամանակ անց ծնողներին տեղեկացրել են, որ երեխան վիրահատության չի ենթարկվել և որ կոմայի մեջ է ընկել, իսկ բժիշկների միջամտության հետևանքով երեխայի լեզուն վնասվել է:
Երեխան պետք է վիրահատվեր այն պատճառով, որ հարվածի հետևանքով նրա թևին եղած խալի տակ արյուն է հավաքվել և մսակալվել:
Ըստ երեխայի ծնողների՝ բժիշկները փոքրիկին մեծ չափաբաժին նարկոզ են տվել, ինչից հետո երեխայի սրտի ռիթմի խանգարում է տեղի ունեցել և այդ պատճառով երեխային չեն վիրահատել: Բացի այդ՝ բժիշկների են մեղադրում նաեւ լեզուն վնասելու համար։
Միևնույն ժամանակ նրանք նշում են, որ երեխային մինչ վիրահատարան տեղափոխելը երեխան մի շարք հետազոտություններ է անցել, սրտի խնդիր չի հայտնաբերվել:
Բժիշկները ևս իրենց հերթին պնդել են, թե անզգայացման ժամանակ է երեխայի մոտ դիտվել սրտի ռիթմի սուր խանգարում և իրականացվել վերակենդանացման միջոցառումներ, որից հետո սրտի աշխատանքը և շնչառությունը վերականգնվել են, և երեխան սկսել է ինքնուրույն շնչել:
Թեև բժիշկները նշում են, որ երեխայի կյանքին վտանգ չի սպառնում, սակայն չի բացառվում, որ մնացորդային խնդիրներ առաջ գան, քանի որ երեխայի մոտ առկա է հետռեանիմացիոն ուղեղի ախտահարման պատկեր:
