Տպել
Ինդոնեզիայի Սուլավեսի կղզու երեք բանտերից շուրջ 1200 դատապարտյալ է փախել այդ տարածաշրջանում տեղի ունեցած երկրաշարժից ու ցունամիից հետո: Այդ մասին հոկտեմբերի 1-ին հայտնել է երկրի արդարադատության նախարար Շրի Պուգու Ուտամին: «Ես վստահ եմ՝ նրանք փախել են, որովհետև վախեցել են, որ կարող են տուժել երկրաշարժից:
Դա, հավանաբար, կյանքի ու մահվան հարց է եղել դատապարտվածների համար»,- ասել է նա լրագրողներին: Արդարադատության նախարարը նշել է, որ, մասնավորապես, Դոնգալե բնակավայրի բանտերից փախած կալանավորների մեծ մասը դատապարտված Էին կոռուպցիայի և թմրանյութերի հետ կապված հանցագործությունների համար:
Սեպտեմբերի 28-ի առավոտյան Սուլավեսի կղզու ափամերձ շրջանում՝ Պալու քաղաքից ոչ հեռու, տեղի է ունեցել 6,1 մագնիտուդով երկրաշարժ: Ավելի ուշ նույն այդ շրջանում գրանցվել են 7,4 մագնիտուդով երկրաշարժ և մի շարք հետցնցումներ: Այնուհետև ԶԼՄ-ները հայտնել են, որ Պալուին մինչև երկու մետր բարձրությամբ ցունամիի է հարվածել: Երկրաշարժերի և դրանց հաջորդած ցունամիի զոհերի թիվը գերազանցել է 1200-ը:
