Տպել
Գլենդեյլի Հերբերտ Հուվերի անվան ավագ դպրոցի սաները բողոքի ակցիա են կազմակերպել`բողոքելով Միացյալ դպրոցական շրջանի որոշման դեմ, համաձայն որի՝ դպրոցի ամենամյա մարզական հանդիպումները չեղարկվել են:
Ինչպես նշում է foxla.com կայքը, ամեն ինչ սկսվել է հոկտեմբերի սկզբին, երբ դպրոցի տարածքում ֆուտբոլային թիմի հայ և սևամորթ, լատինամերիկացի ու այլ ազգերի ներկայացուցիչների մասնակցությամբ դաժան ծեծկռտուք էր տեղի ունեցել, ինչն էլ դարձել էր որոշ աշակերտների հեռացման պատճառ: Հայտնի է, որ ծեծկռտուքին առավելապես հայազգի աշակերտներ էին մասնակցել:
Նշվում է, որ տհաճ միջադեպից հետո դպրոցում չեղարկվել է չորս ֆուտբոլային հանդիպում:
Բողոքի ակցիային մասնակցող աշակերտները դպրոցի ադմինիստրատորների ու իրավապահների հսկողության ներքո քայլել են դեպի Գելնդեյլի Միացյալ դպրոցական շրջանի գրասենյակներ:
Միացյալ դպրոցական շրջանից հայտնել են, որ խաղերը չեղարկվել են անվտանգության նկատառումներով:
Ավելի վաղ որոշ ծնողներ լրատվամիջոցների հետ զրույցում ասել էին, որ դպրոցում էթնիկ լարվածություն կա հայ աշակերտների (դպրոցում ամենամեծ էթնիկ խումբը) և դպրոցի ֆուտբոլի թիմի այլ անդամների միջև:
