Տպել
20-րդ դարի ամենահայտնի նարկոբարոններից մեկի՝ Պաբլո Էսկոբարի կյանքի մասին մի շարք ֆիլմեր, հեռուստասերիալներ են նկարահանվել, գրքեր են գրվել՝ տարբեր աղբյուրների, տեսակետների մեկնաբանմամբ ներկայացնելով նարկոբարոնի կյանքը:
Սակայն աշխարհում կա մեկը, որը, հավանաբար, գիտի Էսկոբարի մասին ամենաստույգ տվյալներն ու ամենաշատ գաղտնիքները:
Ինչպես նշում է Daily Mail-ը, խոսքն Էսկոբարի այրու՝ Վիկտորյա Եվգենյա Հենաոյի մասին է, որը մինչ այս լռություն է պահպանել ամուսնու թեմայով: Հայտնի է, որ 15 տարեկանում Էսբոկարի կինը դարձած Հենաոն ամուսնու սպանությունից 25 տարի անց գիրք է գրել՝ անելով մի շարք ուշագրավ բացահայտումներ:
«Կյանքս ու բանտս Պաբլո Էսկոբարի հետ» խորագրով գրքում Հենաոն բացահայտում է, որ ամուսնու թշնամիները՝ «Լոս Պեպես» զինված խմբավորման անդամները, 220 մլն դոլար են վճարել նարկոբարոնի սպանության համար:
Հայտնի է, որ խմբավորումը կազմված է եղել Էսկոբարի գործունեությունից տուժած անձանցից ու պայքարել է նրա նարկոկարտելի դեմ:
Բացի այդ, այրին գրքում պատմում է Էսկոբարի՝ բանտում վարած ճոխ կյանքի, ինչպես նաև ճաղերի հետևում գտնվելով հանդերձ նարկոկարտելը ղեկավարելու, խոշոր գործարքներ կնքելու մասին:
Նշվում է, որ 57-ամյա այրին երկու տարի է տրամադրել 500 էջանոց գրքի գրմանը:
Հիշեցնենք, որ Էսկոբարը սպանվել է 1993թ. դեկտեմբերի 2-ին՝ Կոլումբիայի ոստիկանության իրականացրած հատուկ գործողության շրջանակում:
