Տպել
ՀՀ Միգրացիոն ծառայությունը Մոսկվայի օդանավակայանում մահացած տղամարդու արտաքսման մասին տեղեկություններ չունի։
Այն, որ Մոսկվայի օդանավակայանում մահացած տղամարդը ՀՀ քաղաքացի է, ում Իսպանիայի իշխանություններն արտաքսել են իրենց երկրից, Հայաստանի միգրացիոն ծառայությունը տեղեկացել է մամուլից։ Այս մասին Sputnik Արմենիային հայտնեց ծառայության մամուլի քարտուղար Նելլի Դավթյանը` հավելելով, որ իսպանական կողմից ծառայությունը որևէ դիմում չի ստացել։
«Իսպանիան, որպես ԵՄ անդամ երկիր, եթե ինչ-որ խնդիր լիներ ՀՀ քաղաքացու հետ կապված, ռեադմիսիոն պայմանագրի շրջանակներում պետք է դիմեր Հայաստանին` տվյալ քաղաքացու մասին տեղեկություններ ստանալու համար։ Իսկ եթե չեն դիմել, նշանակում է ամեն ինչ շատ հստակ է եղել, որևէ կասկած չի հարուցել, որ նա ՀՀ քաղաքացի է»,- ասաց Նելլի Դավթյանը` հավելելով, որ սա Իսպանիայից ՀՀ քաղաքացու արտաքսման վերաբերյալ առաջին դեպքն է։
ՀՀ միգրացիոն ծառայությունում այս պահին փորձում են ճշտել դեպքի բոլոր հանգամանքները։
Հիշեցնենք` Mash տելեգրամ-ալիքի տվյալներով` տղամարդուն Իսպանիայից Հայաստան էին արտաքսել։ Մոսկվայում ինքնաթիռը փոխելիս նա փախուստի է դիմել։ Հայտնում են նաև, որ Մոսկվայի ճանապարհին ինքնաթիռում տղամարդն իրեն ադեկվատ չի դրսևորել. կռիվ է սկսել և հարվածել բորտ-ուղեկցորդին։
Ալբերտ Եփրեմյան
Նոյեմբերի 20-ին, Աթենք թռչող Boeing 737-ի անձնակազմը դիսպետչերին հայտնել է կենդանու հետ բախման մասին։ Քանի որ համակարգը վնասվածքների մասին տեղեկություն չի հաղորդել, ինքնաթիռը չի վերադարձել օդանավակայան։ Ավելի ուշ, ԶԼՄ-ների տվյալներով, տարածքի զննության ժամանակ հայտնաբերվել է տղամարդու դին և նրա անձնական իրերը։
ՔԿ-ն ստուգումներ է սկսել իրականացնել փաստի առիթով, դեպքի վայրում քննչական օպերատիվ խումբ է աշխատում։
Ավելի ուշ ՌԴ-ում Հայաստանի դեսպանատնից Sputnik Արմենիային հայտնեցին նաև մահացածի անձնական տվյալները։ Դրանց համաձայն` նա ՀՀ քաղաքացի, 25-ամյա Ալբերտ Եփրեմյանն է։
