Տպել
«Հյուսիս-հարավ ճանապարհային ծրագրի» առաջին տրանշում 2 միլիոն դոլարի չափով խախտումներ են հայտնաբերվել: Այս մասին լրագրողների հետ հանդիպմանն ասաց ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը:
«Տրանշ 1-ով մեր կողմից բացահայտվել է շուրջ 2 միլիոն ԱՄՆ դոլարի չափով կրկնակի վճարված աշխատանք, որը համապատասխան ընթացակարգով հետ կգանձվի»,-ասաց նա՝ հավելելով, որ ևս 2 միլիոն դոլարի չափով հիմա վերջնական քննություն է կատարվում, և սա դեռ վերջը չէ:
«Որակի վերահսկողության առումով Տրանշ 1-ով և 2-ով ցեմենտի, խճի և բետոնի փորձանմուշներ են վերցվել և ուղարկվել Կանադա լրացուցիչ փորձաքննության»,-հավելեց նախարարի պաշտոնակատարը:
«Հյուսիս-հարավ ճանապարհային ծրագրի» առաջին տրանշի վարկային համաձայնագիրը կնքված է 2009 թ-ի հոկտեմբերի 12-ին: Առաջին տրանշի շինարարության պայմանագրային գինն էր սահմանվել 70,4 մլն ԱՄՆ դոլար՝ ներառյալ հարկերը:
