Տպել
Այսօր՝ նոյեմբերի 26-ին, խոշոր ու ողբերգական ավտովթար է տեղի ունեցել Երևանում։ Ժամը 03։15-ի սահմաններում Mercerdes մակնիշի 05 ZZ 088 համարանիշի ավտոմեքենայի վարորդը Աճառյան փողոցի թիվ 6/3 հասցեի դիմաց մխրճվել է ճանապարհի աջակողմյան հատվածում կայանված Ավան 6-րդ փողոցի բնակիչ Լևոն Ավետիսյանին պատկանող «Մազ» մակնիշի 34 FZ 551 համարանիշի վերամբարձ կռունկի հետնամասի մեջ։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Mercedes-ի 2 ուղևորներ տեղում մահացել են, իսկ վարորդը, ով, ըստ նախնական տեղեկությունների, Երևան քաղաքի Քանաքեռ-Զեյթուն վարչական շրջանի բնակիչ՝ 28-ամյա Գրիգոր Հարությունյանն է, քաղաքացիների և փրկարարների օգնությամբ դուրս է բերվել ավտոմեքենայից և օպերատիվորեն վթարի վայր ժամանած Երևանի 1-03 շտապօգնության հերթապահ բժիշկների հերթապահ բրիգադը նրան տեղափոխել է «Սուրբ Գրիգոր Լուսավորիչ» բժշկական կենտրոն։ Դեպքի վայր են ժամանել արտակարգ իրավիճակների նախարարության փրկարար ծառայության թիվ 15 հրշեջ-փրկարարական ջոկատը և ճգնաժամային կառավարման ազգային կենտրոնի արտակարգ իրավիճակների արձագանքման խմբի ու թիվ 11 հրշեջ-փրկարարական ջոկատի փրկարարները։ Հրշեջ-փրկարարներն օգտագործել են հատուկ տեխնիկա՝ դիերը ավտոմեքենայի միջից դուրս բերելու համար։
Դեպքի վայր են ժամանել Ճանապարհային Ոստիկանության 1-ին սպայական գումարտակի ծառայողներն ու Ոստիկանության Նոր Նորքի բաժնի, Ոստիկանության ավանի բաժանմունքի և Ոստիկանության Երևան քաղաքի վարչության ՊՊԾ գնդի 2-րդ վաշտի ծառայողները։ Վթարի մասին Երևանի ՃՈ օպերատիվ կառավարման կենտրոնի պատասխանատու հերթապահ Արմեն Հարությունյանը տեղեկությունը փոխանցել է Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին, որտեղից ժամանել է քննչական խումբը՝ բաժնի պետ Արտաշես Վանյանի, բաժնի պետի տեղակալ Սամվել Սամվելյանի և հատկապես կարևոր գործերով ավագ քննիչ Մանվել Մուրադյանի գլխավորությամբ։
Դեպքի վայրում հավաքվածներն ասում էին, որ վիրավորին հիվանդանոց են ուղեկցել Ոստիկանության Նոր Նորքի բաժնի պետ Հայկ Թումանյանը և ՃՏՊ քննչական բաժնի պետ Ա. Վանյանն ու Ս. Սամվելյանը։ Տեղում քննչական աշխատանքները ղեկավարող ՀԿԳ ավագ քննիչ Մ. Մուրադյանի որոշմամբ հարուցվել է քրեական գործ՝ ՀՀ քր. օր-ի 242 հոդվածի 3-րդ մասի (ճանապարհատրանսպորտային պատահար, որն անզգուշությամբ առաջացրել է 2 ավելի մարդու մահ) հատկանիշներով։ Ոստիկանությունն ու քննչական բաժինը պարզում են վարորդի, մահացածների ինքնությունը։ Գ. Շամշյանը հայտնում է նաև, որ վթարի վայրում մի քաղաքացու ինքնազգացողությունը վատացավ, և օպերատիվորեն ժամանած բժիշկների հերթապահ խումբը նրան տեղում առաջին բուժօգնություն ցուցաբերեց, որից հետո տեղափոխեցին հիվանդանոց։
Ըստ տեղեկությունների՝ նա Իրանի Իսլամական Հանրապետության քաղաքացի է, ում կյանքին ու առողջությանը վտանգ չի սպառնում։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
